Izakhamizi zakoBulawayo zithi kuyadingeka ukuthi uhulumende engezelele inhlelo zakhe zokuhlola abantu igcikwane leCoronavirus, kusukela kuma wards abo, kusiya kwezinye izigaba, ukwenzela ukwenqabeka ukumemetheka kwalo.
Sebengamatshumi amane lasithupha abahlaselwe yileligcikwane elizweni, eselibulele abane.
Isiphathamandla senhlanganiso elwela amalungelo abahlali balelidolobho eyeBulawayo Progressive Residents Association, uMnu. Thembelani Dube uthi lanxa inani labantu abahlaselwa yileligcikwane likhuphuka, imizamo kahulumende eyokuthi aqale ahlole izizalwane zeZimbabwe eziphindela ekhaya zivela kwamanye amazwe ngohlelo lwe quarantine liyancomeka ngoba yikho lapho okutholakala abanye abaleCoronavirus.
Lokhu kwenzakala ngesikhathi amanzi eswelakala edolobheni lakoBulawayo, njalo kusukela ngoMvulo, inengi lizawathola okwamahola angamatshumi amabili lane kuphela ngeviki, okuzabangela ukuthi kubenzima ukuvikela ukumemetheka kweCoronavirus.
