amalinks wokungena

Breaking News

Inani Labasakhulayo Elivuka Ligijima Ekuseni Liyaqansa Ngesikhathi Abantu BekuLockdown


Abagijimayo bezelula bengakaqalisi ukugijima

Abasakhulayo abedolobheni lako Bulawayo sebethole indlela ezithile zokuziphathisa ukumelana lesimo esidalwe ngumkhuhlane we Covid 19, ngesikhathi ilizwe liphakathi kweziqondiso zeLockdown. Ukugijima ngeyinye yalezi ndlela ezibaphathisayo.

Liyanda inani labantu abavuka ekuseni begijima edolobheni lako Bulawayo ngesikhathi ilizwe liphakathi kokulwisana lomkhuhlane we Covid 19 wona osuhlasele abantu abedlula izigidi ezine emhlabeni jikelele.

Laba ngabagoqela ababevele begijima besakha lokuqinisa imizimba kanye labasakhulayo abangabadlali bemidlalo etshiyeneyo.

Umdlali wenguqu uDonell Chiweshe uthi yena ugijima yedwa kulezinsuku ngoba kungavunyelwa ukuba amaqembu abuthanise abadlali.

“Mina ngigijimela ukuba umzimba wami uhlale uqinile ulungele ukuba nxa kungathiwa imidlalo yenguqu iqale ngenyanga kaNcwabakazi kukhanye ukuthi lami bengisebenza lapha emgwaqweni,” kutsho uChiweshe.

Ugatsha luka hulumende olulawula ukuqhutshwa kwezemidlalo elizweni, olwe Sport and Recreation Commission, lukhuphe umbiko lusithi ezinye inhlanganiso zemidlalo sezizavunyelwa ukuba ziqhube inhlelo zazo nxa zingaba lenhlelo ezokuvikela abadlali.

Umdlalo wenguqu kawukho kuluhlu lwemidlalo okuthiwe isingadlalwa elizweni ngoba wona ubalelwa kuleyo efaka abadlali engozini.

Sitshayisane njalo lamantombazana asakhulayo uWendy, uPhumzile kanye lo Malaika labo abathi bangabadlali bezemidlalo labo abakade begijima emgwaqweni weIntemba.

“Sigijimela ukuba siqinise imizimba yethu ingakhuluphali njalo singabanjwa yimikhuhlane. Sidlala imidlalo egoqela inguqu, ibhola lokuqaga kanye lemidlalo esiyidlala singabangane egoqela umatshayana,” kutsho uPhumzile.

Imigwaqo eminengi emalokitshini ako Bulawayo iyaphithizela ngabasakhulayo laba ekuseni njalo amajaha asakhulayo uZibusiso lo Thabiso bathi bona bagijima besuka elokitshini lase Pumula baze bayephenduka sebefike ejikweni eliqonda enyuvesi yeSolusi emgwaqweni oqonda eKhami.

“Siyagijima sisiyafika eSolusi Turn njalo sihlezi vele sigijima ukuze imizimba yethu ihlale iqinile. Siyazivikela njalo ngokugijima sibabili kuphela njalo siyatshiya isikhala phakathi laphakathi,” kutsho uThabiso.

Kungakaqhamuki umkhuhlane we Covid 19 bebevele bekhona abantu abavuka begijima emgwaqweni njengendlela yokwakha lokuqinisa umzimba kodwa lelinani selikhuphuke ngemva kokuba kumiswe zonke inhlelo zemidlalo elizweni.

Imidlalo osekuthiwe isingadlalwa ngebalisa iarchery, pool, swimming, athletics, rowing, equestrian, fencing, golf, polo, motorsport/BMX, shooting, tennis, chess, darts, drafts, goal ball (visually impaired), cricket kanye le table tennis.

Facebook Forum

XS
SM
MD
LG