amalinks wokungena

Ingcwethi zombusazwe zithi umsekeli kamongameli uMnu. Emmerson Mnangagwa usephelelwe ngumphako.

Lokhu bakutsho ngemva kokuba umkamongameli, uNkosikazi Grace Mugabe, ethuke uMnangagwa esithi ufuna isikhundla somkakhe ngendlela engayisiyo.

Amazwi la uwatsho ngoLwesine ntambama emkhosini wokuvulwa kwebhanga lokuphathisa inhlelo zabasakhulayo ele Youth Empowerment Bank, eHarare, lapho athe uMnangagwa uqamba amanga ukuthi wafakelwa itshefu.

UNkosikazi Mugabe uqhubeke ethuka uMnangagwa esithi uphakathi kwalabo abamethuselayo lemuli yakhe befuna ukugenqula umbuso womkakhe ngodlame.

Ingcwethi zombusazwe zithi amazwi kaNkosikazi Mugabe aveza ukuba akusensuku zatshwala ukuthi uMnangagwa umumo kwezombusazwe ungamguqukela, zisithi kusiyafika umhlangano omkhulu weZanu PF ngoMpalazi uyabe esexotshiwe ebandleni njengalokho okwenzakala kuNkosikazi Joice Mujuru.

Omunye walez’ingcwethi, uMnu. Alphious Mapuranga, uthi lokho okwenzakala kuMujuru kuzakwenzakala lakuMnangagwa ngoba kusobala ukuthi uMugabe usebenzisa umkakhe endabeni ezinje.

Eyinye njalo yalezi ngcwethi, uMnu Rejoice Ngwenya, uthi lobanje uNkosikazi Mugabe engasafuni ukuthi uMnangagwa aqhubeke esesikhundleni, uMugabe ngokwakhe akasoze amxotshe.

Ingcwethi zezombusazwe kanye lozulu jikelele bathi uNkosikazi Mugabe ukhanya eselamandla ukwedlula iziphathamandla zonke zebandla leZanu PF njalo kusobala ukuthi nguye ozakutsho ukuthi ngubani sibisibili ozathatha isikhundla somkakhe lapho esesuka kuleso sikhundla.

Ukufuthelana okuphakathi kwebandla leZANU PF kubangisanwa ukuthi ngubani ozakwelama uMugabe lapho esesuke kuleso sikhundla sokuphambanisa indlela uhulumende aqhuba ngayo umsebenzi ngoba iziphathamandla zebandla ziyizo ezikuhulumende zitshona ziphoselana aqatha ngesikhathi kumele zimele zilungisise inhlupho ezibhekane lelizwe kwezomnotho osuguqe phansi ngamadolo, inhlalakahle kazulu lakunhlangothi zonke zempilo.

Facebook Forum

XS
SM
MD
LG