Kulandela ukuvalwa kwenengi lamankapani elizweni okulokhu kuqhubeka ngenxa yokucuba komnotho welizwe, labo abalokhu besenza bathi babhekana lomthwalo onzima owokunakekela imuli zabo kanye lezihlobo ezingasebenziyo, ngoba iholo labo livele liphansi.
Isiphathamandla senhlanganiso elwela amalungelo ezisebenzi eye Zimbabwe Congress of Trade Unions uMnu. Japhet Moyo usanda ukutshela iStudio 7 ukuthi ukudingisisa okusanda ukwenziwa yinhlangnaiso yakhe kufamanise ukuthi zilokhu zikhona izisebenzi ezingatholi iholo lazo ngesikhathi esifaneleyo, njalo lezo ezigunyulwa umsebenzi zilwisana lokuthola iholo ezalisebenzelayo.
Kusenjalo, uMnu. Mandla Mpabanga osebenza kwenye inkampani koBulawayo utshele uSithandekile Mhlanga weStudio 7 ukuthi lanxa elokhu esebenza, impilo ilokhu inzima kuye.
