amalinks wokungena

Breaking News

Inengi lisola Indela Okukhethwa Ngayo Amaqhawe Esizwe


Joshua Nkomo

Ababengabalweli bempi yenkululeko, ababengamasotsha kanye lamapholisa eZimbabwe asebehlala kweleSouth Africa bathi kabavumelani lenkulumo kamongameli Mugabe yokuthi akulanto embi ngendlela okukhethwa ngayo amaqhawe esizwe. Inengi labo bathi uhlelo lokukhethwa kwamaqhawe esizwe seluguqulwe lwenziwa umvuzo wokupha labo abangamalunga eZanu PF.

Inengi lababengabalweli benkululeko, ababengamasotsha amapholisa loba omlindijele abakhulume leStudio 7 eSouth Africa bathi kabavumelani lendlela okuphiwa ngayo isicoco sokuba liqhawe lesizwe nxa umuntu esefile.

Bathi uhulumende usethethe loluhlelo lwesizwe walwenza uhlelo lokubonga amalunga ebandla leZanu PF.

Owayekuviyo lebutho leZimbabwe njalo engumsunguli weMDC Veterans Association umnumnzana Solomon Chikowero, uthi indlela amaqhawe esizwe asekhethwa ngayo ithelela usizi.

Owaye ngumlweli wempi yenkululeko umnumnzana Andrew Nyathi, empini owayesaziwa ngelithi Tom, uthi njengabalweli bempi yenkululeko kabavumelani lokwenziwa manje ukuthi nxa ungasilo lunga leZanu pf ngeke uphiwe lesi sicoco kungakhathalekile ukuthi wayisebenzela kangakanani inkululeko.

Umnumnzana Andrew Ndlovu laye uthi indlela okukhethwa ngayo kufanele iguqulwe ukuze igoqele umuntu wonke oyisizalwane seZimbabwe loba ekuliphi ibandla lezombusazwe.

Umnumnzana Nyathi uthi iphutha lavele laba khona ngokuthi sekunikezwa imivuzo ngemva kwempi kutshiywe phandle izakhamizi ezathwala nzima ukuze inkululeko ibekhona.

UNyathi uthi kulusizi ukuthi kulabalutshwana asebesuke bagodla zonke izinto ezenza kwayaliwa impi yenkululeko.

Bathike njalo ilanga lamaqhawe kanye lelamabutho eZimbabwe sekungamakhefu angasela mutsho ngenxa yenyathelo likahulumende lokusebenzisa mahlayana ababengabalweli benkululeko, abebutho kanye lamapholisa.

Umnumnzana Nkosini Tshuma owayengumlindijele uthi kungumlandu waloba ngubani osetshenziswa ukuhlasela umphakathi ukuthi ale ukwenza lokho.

Bathi kufanele uzulu weZimbabwe azibuze ukuthi kungani amaqhawe alwela inkululeko afana labo Ndabaningi Sithole, Lookout Masuku kanye labo James Sikerema bengayiphiwanga inhlonipho yokuba ngamaqhawe esizwe kodwa yaphiwa abanye abangazange vele baye empini kodwa ababedumenje kuphela ngokutshaya abantu lokukhankasela ibandla leZanu PF.

Ngimele istudio 7 eJohannesburg kweleSouth Africa nginguBenedict Nhlapho

XS
SM
MD
LG