Amalunga edale lephalamende asekhuthaze umphathintambo wezemali uMnu. Mthuli Ncube ukuthi acitshe isikhalazo sokuthi kubhadalwe umthelo obiza amadola eMelika angamatshumi amahlanu nxa kuthengwa omakhalekhukhwini ngoba ungaphazamisa inhlelo eziqhutshwa ebulenjini.
Lokhu kuphume emhlanganwni oqhutshwengoMvulo kulandela uluhlu lokusetshenziswa kwemali yelizwe olwe budget, olwethulwe nguMnu. Ncube ngoLwesine olwedluleyo olubiza phose i trillion eyodwa; 927 billion dollars.
Sixoxe lesiphathamandla senhlanganiso elwela amalungelo ababalisi eyeZIMTA uMnu. Sifiso Ndlovu, ongomunye wabakhangelelwe ukuphatheka emhlanganweni loMnu. Ncube labanye, owokucubungula loludaba ngoLwesithathu kuhlelo oluqoqwe ngenye inkampani kamabonakude.
UMnu. Ndlovu uthi kulezinye inhlamvu ze budget ezingenqabela ukuthuthuka kwezomfundo, ezigoqela iholo lababalisi lenhlelo zezikolo njalo uzabuzisisa uMnu. Ncube ukuthi achasise ngazo.
UMnu. Anglistone Sibanda, olwela ilungelo loluntu uthi ngabe uhulumende ulungisa uhlelo lokuthatha umthelo kulabo abazisebenzayo.
I budget le ilokhe isahluzwa njalo uMnu. Mthuli Ncube ubikwa esithi umnotho welizwe ukhangelelwe ukuthuthuka ngesilinganiso esedlula kancinyane okuhlanu ekhulwini; 5, 5 percent.
