Inengi selisole umphathintambo kahulumende obona ngezamandla amagetsi uMnu. Joram Gumbo ngesinqumo asithetheyo esokuthi kungasasetshenziswa izigubhu ezigoqela ama jerry cans awokuthela amafutha ezimota awokuhambisa ngoba ebangela ukusilela kwamafutha njengoba abantu bewathenga ngobunengi bawo.
Ibandla leMDC elikhokhelwa nguMnu. Nelson Chamisa lethule umbiko lisola kakhulu inyathelo likaMnu. Gumbo.
Ukhansila ka Ward One koBulawayo, uMnu. Mlandu Ncube, olilunga lalelibandla uthi inengi lisebenzisa ama jerry cans ukuthenga amafutha awokusebenzisa emitshineni yama generators lokunye.
Isiphathamandla sebandla leZANU PF, uMnu. Joseph Tshuma, uthi njengosomabhizimusi osebenzisa imihlobo etshiyeneyo yezimota, inyathelo leli lingamthwalisa amagabha avuzayo.
Lanxa uhulumende esithi ingxenye yemali eyizigidi ezingamakhulu amahlanu amadola $500 million, ayebolekayo ngeyokuthenga amafutha ezimota, kusobala ukuthi alokhu esilela.
UMnu. Tshuma uthi okungcono yikuthi uhulumende aqale ekhulumisane labantu engakabethuleli inhlelo zakhe, ukwenzela ukuthi azwe izikhalazo zabo.
UMnu. Gumbo ubikwa esithi abazatholakala bethengisela abalezigubhu zokuthwala mafutha ezimota bazathathelwa incwadi ezibapha imvumo yokusebenza ezama licence. Uthi bazajeziswa ababhadalisa abantu ngamadola eMelika labadulisa amafutha la, njalo amapholisa azaphathisa kulumkhankaso.
Kodwa ingcwethi ezicubungula ezomnotho welizwe zithi kufanele uhulumende alungise isisusa sokubhidlika komnotho welizwe, ikakhulu ukusilela kwemali.
