Ukhetho lokudinga ukhansila ka ward 28 eCowdray Park lubikwa luqhutshwe kuhle ngoMvulo edololobheni lakoBulawayo, lanxa abanye bekhonona ngokuthi bathole indawo zabo zokuvotela sezintshintshiwe ebhukwini le voter’s roll.
Bekuncintisa amalunga e-MDC amabili, uNkosazana Nomagugu Mloyi, otshele iStudio 7 ukuthi kaphumi emncintiswaneni ngoba kwakulokuqilibezela kukhetho lwama primary elections olwakhetha omunye wakhe uAlderman Collet Ndlovu, owake waba ngukhansila kulindawo. UAlderman Ndlovu uyakulandula lokhu.
Balitshumi lasitshiyagalombili abancintise kulolukhetho, olubekhona ngenxa yokutshona kowayengukhansila uMnu. Hapson Ncube weMDC ngomnyaka odluleyo.
Inhlanganiso ezimeleyo ebona ngokuqhutshwa kokhetho eyeZimbabwe Electoral Support Network-ZESN layo igcizelele ukuthi abantu bebebuyiselwa emuva njalo ithi izaqoqa umbiko ogcweleyo ngalolukhetho. Sixoxa loAlderman Ndlovu ngaloludaba.
