Ngesikhathi umongameli Emmerson Mnangagwa esithi wazisa amanye amazwe ukuthi amabandla aphikisayo labamsolayo kubandla lakhe bazama ukugenqula umbuso wakhe bencediswa ngamazwe aphetsheya, abanye bathi kusobala ukuthi udlakela luvelela kuhulumende wakhe ngenxa yobufakazi bochuku lwamapholisa lamasotsha ebantwini, obulokhu buvela.
Ukuhlaziya loludaba sixoxe loMnu. Zenzo Nkomo, ingcwethi ecubungula ezombusazwe esiqale ngokumbuza ukuthi kambe amanye amazwe azamlalela njalo amkholwe na umongameli Mnangagwa.
Kusenjalo, umkhokheli webandla leMthwakazi Republic Party uMnu. Mqondisi Moyo uthi kulamalunga ebandla lakhe ahlukuluzwa ngamalunga ebutho kulandela ukutshengisela kwabantu ngenyanga edluleyo, kukanti bakhuthaza abanye ukuthi babike izehlakalo ezinje ngendlela yokulandela umthetho.