Inengi lithi akukaguquki okunengi kwezomnotho welizwe kulandela ukwehla kwesilinganiso semali yokuthenga idola leMelika ngama bond notes ngeviki edluleyo, obesokuthwalise inengi amagabha avuzayo.
Impahla ezigoqela amafutha okupheka lokunye zilokhu zisilela, kukanti inengi lezitolo ezazivaliwe okwesikhatshana ngenxa yaloluhlupho zilokhu zingakavulwa. Impahla ezitholakalayo ezitolo ziyadula kakhulu njalo inengi alenelisi ukuzithenga.
Umongameli Emmerson Mnangagwa ubikwa esithi uhulumende uzaqinisa imizamo yokujezisa abathenga lokuthengisa imali emigwaqweni ngoba kuyibo ababangela ingxabangxoza ekhona kwezomnotho. Umphathintambo obona ngezemali uMnu. Mthuli Ncube uthi kulenhlelo ezithile zokulungisa umnotho welizwe, njalo kufanele abantu babe lesineke.
Ukuhlaziya loludaba, sixoxe loMnu. Dumisani Ncube, isiphathamandla senhlanganiso elwela amalungelo abathengisa impahla ezitaladini eye Bulawayo Upcoming Traders Association.
UMnu. Ncube uthi ukubhidlika komnotho welizwe kubangela ukuthi bengatholi inzuzo ebonakalayo kubhizimusi yokuthengisa. Uthi uthemba ukuthi amalunga enhlanganiso yakhe azathola umsebenzi kuvinkili elakhiwayo koBulawayo ele eGodini Mall, ngoba inengi lilahlekelwe zindawo zokuthengisela.