Abantu abedlula amatshumi amathathu babikwa befile engozini zemigwaqo ezimbili eZimbabwe kunsukwana ezisanda kwedlula. Lokhu kujayele ukubangelwa ngabatshayeli abazigijimisa imotha ngesiqubu esibi kanye lokugqitshwa kukazulu ezimoteni lezi zihamba zigcwele okwedlulisa amalawulo.
Kufe abantu abalitshumi lasitshiyagalolunye ngomgqibelo emgwaqweni osuka eHarare usiya eConcession kwatshabalala njalo abalitshumi lane ngolweSibili emgwaqweni oya edolobheni leMutare.
Amapholisa abike ukuthi abantu abalitshumi abafe engozini yangoMgqibelo ngabemuli yinye eye Hatcliff.
Aphinde athi eyinye yezimota lezi ibithwele abantu abedlula okusemthethweni lobanje ingcwethi ezicubungula okwenzakala emigwaqweni zisithi ingozi ezinengi eZimbabwe zibangelwa yikuswelakala kwemali yokuthenga ama tyre, abatshayeli abagijimisa imota okwedlulisa amalawulo lalabo abathenga amaphepha okutshayela kanye lokuthwala abantu abanengi kakhulu ezimoteni.
Ngesikhathi uzulu elokhe ethithibele ngokufa kwabantu okusanda kwenzakala emigwaqweni, akwaziwa ukuthi lizaba linani elinganani labantu abazalahlekelwa yimpefumulo ngekhefu lamaqhawe, ele Heroes Holiday, ngeviki ezayo njengoba kukhefu lephasika kutshabalale abantu phose abangamatshumi ayisitshiyangalombili.
Ukuhlaziya loludaba uGibbs Dube uxoxe loMnu. Strike Ndlovu umgcinisihlalo we Bulawayo Public Transporters Association loMnu. Kucaca Phulu igqwetha elilwela amalungelo oluntu abathi kunengi okubangela ingozi emigwaqweni eZimbabwe okubalisa ukuthenga amacence okutshayela.
