Uzulu lokhe engasuthiseki ngokuphendla okwenziwa ngamapholisa ngemfa ka General Solomon Mujuru njengoba lomkakhe uNkosikazi Joice Mujuru ongumsekeli kaMongameli Robert Mugabe ethandabuza ngokutshona kwakhe.
Abakunhlanganiso ezizimele zodwa lamagqwetha atshiyeneyo bathi kumele udaba lolu luphendlwe ngumthethwandaba ukuze kungafihlwa ngamapholisa ukuthi uGeneral Mujuru wabulawa kuyini.
Bathi amapholisa eZimbabwe kawathenjwa ekuphendleni udaba olunje lokunye nje akwenzayo njengoba ethanda ukufumbhathiswa.
Kusobala ukuthi abalandeli bebandla leZANU PF bayethuswe yimfa ka General Mujuru etshiye abanye bakhe bengazi ukuthi kuzenziwani ngokudinga ongathatha isikhundla sikaMongameli Mugabe osegugile.
Bekulembiko ethi uGeneral Mujuru ubelwisana lompathintambo wogatsha lwezomvikela uMnu. Emmerson Mnangagwa efuna ukuthi umkakhe afakwe esikhundleni lesi nxa uMongameli Mugabe engakhitshwa.
Kambe kungenzakala na ukuthi umthethwandaba uphendle imfa ka Mujuru? Igqwetha lako Bulawayo uMnu. Lizwe Jamela uthi kuyenzakala ukuthi udaba lolu luphendlwe nguthethwandaba nxa imhuli kaMujuru ingacela ukuthi kwenziwe ngaleyo ndlela.
Ingcwethi kwezombusazwe uMnu. George Mkhwanazi uthi umthethwandaba uyabe uchitha isikhathi nxa ungadungulula loludaba njengoba impumela yakhona ingeke yatshelwa uzulu njengalokho ukwenziwa kuhlolisiswa ukubulawa kwabantu yi Fifth Brigade eNkabazwe lakwele MaNdebeleni.
Inengi Lithi Kungaphendlwa Imfa KaMujuru Ngumthethwandaba, Impumela Ilakho Ukufihlwa Nguhulumende
- Gibbs Dube
