Ibhanga elikhulu lelizwe eleReserve Bank of Zimbabwe (RBZ) selisehluleka ukubhadala izikwelede zalo, ukuqhuba imisebenzi yalo etshiyeneyo efana lokukhangela im’thelo yama interest rates, ukunika amanye amabhanga izikwelede nxa esethwele nzima, ukuphungula kumbe ukufaka imali kunotho yelizwe kanye lokubhuqana le inflation rate.
Ezinye ingcwethi ezicubungula ezemali lenotho zithi akusensuku zatshwala ukuthi lelibhanga lidilike kodwa ezinye zithi kumele kulungisiswe imthetho ekhangelane lalelibhanga ngoba ukudilika kwalo kuzabisela muva ukuthuthuka kwenotho yelizwe.
UMnumzana Rejoice Ngwenya ingcwethi ecubungula ezenotho uyihluze lindaba eloMnumzana Bekithemba Mhlanga ingcwethi ecubungula ezombusazwe lezenotho beloGibbs Dube we Studio 7.
UNgwenya uthi ibhanga leRBZ elaligiga imali okungekho emthethweni njalo lisenza ezinye inhlelo ezihambelana lebandla leZanu PF, kumele lidilizwe libeselifakwa phansi komqondisi okuthiwa ngesilungu nguCurator ozabona ukuthi ibhanga leli lingabhadala njani izikwelede njalo lingavuselelwa njani.
Umnu. Ngwenya uphinde wathi njengoba lelibhanga lenza inhlelo ezingaphandle komthetho weReserve Bank of Zimbabwe Act, kumele libengumzekeliso kwamanye amabhanga ngakho-ke kuyimfanelo ukuthi lidilizwe kuthi-ke labo ababesenza inhlelo besekelana lebandla leZanu PF babotshwe.
Kodwa-ke uMnu. Mhlanga uthi akumelanga ibhanga leli lidilike ngakho-ke kumele kulungisiswe imthetho ekhangelane lokusebenza kwalelibhanga kungakasuswa bonke abantu abenza okubi eRBZ.
