Izakhamizi zakoBulawayo zitshele amalunga ekhomidi yedale lephalamende ebona ngembuso yezabelo, ukuba inguquko efuna ukulethwa emthethweni weLocal Government Laws Amendment Bill abawufuni lakuwuzwa ngoba wephula amalungeleo abo amunyethwe yisisekelo sombuso.
Umnunzana Felix Mafa uthi yena waphatheka ekulotshweni kwesisekelo sombuso njalo uzulu ukubeke mgceke ukuthi ufuna imbuso yezabelo iDevolution of Power ngakhoke ibill elotshwe nguKasukuwere iyephula amalungelo oluntu. uMafa ubikwa edabule iphetshana elilotshwe liBill phambi kwamalunga edale lephalamende.
UDokotela Hadebe yena ubike ukuba uyadana uma idale lephalamende ligijima ngebill kukanti yena uhambise ipetiton ekuqaleni komnyaka edale lephalamende lambiza ukuzochasisa.
Osakhulayo uNkosazana Grace Mutanda ubike ukuba ibill kaKasukuwere kayifuni njengontanga ngoba ayimuphi umsebenzi kalethe idevolution.
Unkosikazi Jessi Majome olilunga lekhomithi ebiseNkulumane Hall ubike ukuba bagijimisiwe ekwenzeni lemihlangano njalo uzwe kuthiwa sekuzayiwa eMatebeleland South leMatebeleland North ngoMvulo weviki ezayo.
UMnunzana Joel Guebuza elinye ilunga ledale lephalamende ubike ukuba indleko ingabe ibangele ukuba uhlelo lungagoqeli ilizwe lonke.
Uzulu wakoBulawayo uqale ukutshengisela ngokuhlabela lapho ikhomithi isithe umhlangano awuphele bona besafuna ukukhuluma.
Umhlangano wakoBulawayo ubikwa uphele abantu besafuna ukukhuluma njalo wonke umuntu okhulumileyo ubengemukeli iBill le, ethi ibathathela amalungelo abo okuzikhethela abakhokheli bezabelo njalo inika umphathintambo amandla adlulise amalawulo.
Uzulu obesemhlanganweni wakoBulawayo wokuhlaziya inguquko emthethweni wokubuswa kwezabelo iLocal Government Ammendment Bill ukubeke sobala ukuthi kemukeli ngitsho lakancane inguquko efuna ukulethwa ngumpathintambo wembuso yezabelo uMnu. Savior Kasukuwere besithi angadingi ukusebenzisa abantu empini yakhe yokufuna ukuxotsha umsebenzi oMayor bamadolobho abakhethwa ngabantu ikakhulu abamabandla aphikisayo.
Ukuhlaziya loludaba uPraxedes Jeremiah uxoxe loMnu. Mike Ndiweni olwela amalungelo oluntu endawonye legqwetha elidumileyo uMnu. Kucaca Phulu abathi yebo limihlangano iyamukeleka kodwa milutshwana njalo kumgceke ukuthi abantu bona abalandaba lokugijinyiswa yile inkulumo bona abakufunayo yinkululeko yokuzibusa kwezabelo iDevolution of Power.