Bekungabizwa ozwayo eStanley Hall, koBulawayo kusenziwa imicimbicimbi yokunanza imisebenzi emihle eyenziwa ngumuyi uDr Joshua Mqabuko Nkomo ngelanga akhothama ngalo lika mhlaka 1 Ntulikazi ngo1999.
Okhulume emele imuli yakoNkomo indodana kamuyi uMnumazna Sibangilizwe Nkomo utshele uPraxedes Jeremiah weStudio 7 ukuthi leli langa sebelibiza ngokuthi yiJoshua Nkomo and Liberators Day ngoba bedinga ukunanza hatshi imisebenzi kaNkomo yedwa kodwa lalabo ayesebenza labo ukulwisana lombuso woncindezelo ukuze likhululwe eleZimbabwe, kungabantu athi sebakhohlakala bengazange baphiwe inhlonipho epheleleyo.
Njengemuli uthi sebeke benza imizamo yokukhulumisana lohulumende ukuthi leli langa elivame ukubuthanisa abantu abanengi esikhumbuzweni selanga uNkomo akhothama ngalo becela ukuthi libe likhefu abantu bengayi emsebenzini.
"Sike salobela ugatsha lwendaba zasekhaya lusakhokhelwa ngubaba uKembo Mohadi kodwa asitholanga impendulo ecacileyo kodwa lokhe singakalahli ithemba lokuthi lokhu kwenziwe sizabe lokhu siqoqoda eminyango eyiyo engenza lokhu kufezeke"
UNkomo uchasise njalo langempilo kayise lokuthi kuyini okwakusenzakala empilweni yabo yangekhaya njengemuli, kuqathaniswa lalokho okwakubonwa ngumpakathi.
“Ubaba wayesikhuthaza ukufunda esithi imfundo iqakathekile njalo ngekhaya kwakungakhulunywa ngezombangazwe kangako”.
Ebuzwa ngokuthi uNkosikazi Joanna Nkomo owayesaziwa ngokuthi nguMafuyane wayephatheka okungakanani kwezombangazwe? uNkomo uthi “Umama wayengaphatheki kabanzi njengobaba kwezombangazwe ngoba umsebenzi omkhulu ayelawo ngowokuwondla abantwana, ubaba ngesikhathi esinengi wayengekho ekhaya ngaphandle kokucebisa abantu lokubenza I councelling. Ngakithi vele kwakutshona kugcwele abantu ngakhoke kwakungumsebenzi ukutshona esamukela labo bantu.”
