Umkhankaso wokuthi uhulumende engaqhatshi ababalisi abangenelisi ukukhuluma ulimi lwesiNdebele lezinye indimi ezikhulunywa eMatabeleland uqhubekela phambili lebandla leZANU PF lisithi lizakhweza loludaba emhlanganweni walo omkhulu owe Congress.
Inengi lithi uhlupho lolu yilo olubangela ukuthi abantwana, ikakhulu abaqhuba imfundo ephansi bengaphumeleli emhlubulweni weMatabeleland, nxa kuqathaniswa lezinye izigaba zelizwe.
Isisekelo sombuso esitsha selizwe sithi kufanele ilizwe linanze indimi zonke ezikhulunywa elizweni ngokusemthethweni, hatshi isiShona lesiNdebele kuphela.
Ukuze sihlaziye loludaba, sixoxe loMnu. Felix Magalela Mafa, ingcwethi kwezemfundo, endawonye loMnu. Bekezela Maduma, isiphathamandla se Gwanda Residents Association, njalo ecubungula ezombusazwe.
Bobabili bagcizelela ukuthi uhulumende alandele isisekelo sombuso esitsha ukwenzela ukuthi indimi ezitshiyeneyo zifundiswe ezigabeni zazo. Baphinde bagcizelela ukuthi uhlupho lwendimi alukho ezikolo kuphela ngoba inengi lamapholisa kanye labomongikazi abasebenza eMatabeleland bengenelisi ukukhuluma ulimi lwesiNdebele.
