Inhlanganiso ezitshiyeneyo zithi kazithakazeleli uluhlu lwendleko zikahulumende, ibudget yelizwe yomnyaka ka 2011 eyethulwe izolo ngumphathintambo wezemali.
Lezinhlanganiso zithi kusobala ukuthi akulamali efakwe kunhlelo zokunanza uzulu.
Inhlanganiso ebona ngokuthuthukisa inotho yabansundu iAffirmative Action Group ithi izigidi ezinhlanu zamadola eMelika ezifakelwe uhlelo lokwabelana inotho yamankampani emazweni kayeneli loluhlelo.
Ababalisi benhlanganiso ye Progressive Teachers Union of Zimbabwe labo bathi loba nje uMnu. Tendai Biti efake imadlana engenza ukuthi ababalisi bathole iholo eliphezulu kancane, akukacaci ukuthi imali le izasetshenziswa njani.
Kusenjalo, inhlanganiso yezisebenzi iZimbabwe Congress of Trade Unions ithi izisebenzi zithukuthele nge budget yomnyaka ozayo.
Kodwa-ke abalandeli bebandla le Movement for Democratic Change elikhokhelwa nguMnu. Morgan Tsvangirai batshayele uMnu. Biti ihlombe besithi wenze ibudget ezasuthisa uzulu.
