amalinks wokungena

Breaking News

Inhlanganiso ye Buy Zimbabwe Yenza Umhlangano Wokuvuselela Umnotho Welizwe


Inhlanganiso ekhankasela ukuthi uzulu athenge impahla eyenziwa eZimbabwe, eye Buy Zimbabwe, isiqoqe umhlangano omkhulu ozakwenziwa eHharare ngoLwesithathu langoLwesine.

Lumhlangano uzabe ukhangela ngokuswelakala kwemisebenzi, imali kanye lamankampani athwele nzima.

Umnu. Robert Muganda ongumqondisi wokukhitshwa kwembiko eBuy Zimbabwe utshele VOA Studio 7 ukuthi okunye njalo okuzahlafunwa emhlanganweni lo yikuthengisela uzulu impahla eyenziwa eZimbabwe kanye lemazweni akuzwekazi le Africa anjenge Zambia, Malawi, South Africa, Mozambique le Botswana.

Umnu. Muganda uthi kukhangelelwe ukuthi kuzabe kulabo somabhizimusi kanye labameli benhlanganiso ezitshiyeneyo abanengi emhlanganweni lo ozama ukuvuselela inotho yelizwe.

Uphinde wathi uzulu laye ukhangelelwe ukuthi uzakuya eAfrica Square lapho okuzabe kulamankampani amakhulu azabe ebukisa impahla etshiyeneyo.

Umnu. Masimba Kuchera ingcwethi kwezenotho uthe kuyabukeka okwenziwa yinhlanganiso le loba nje kujayelekile ukuthi imihlangano enje ingaphumi lezinqumo eziguqula inotho kazulu.

XS
SM
MD
LG