Inhlanganiso elwela amalungelo oluntu eye Citizens Cabinet isisole umongameli Emmerson Mnangagwa ngokuya eRussia ngesikhathi kulokutshengisela elizweni.
Umongameli Mnangagwa ufike eRussia ngoMvulo njalo ukhangelelwe ukwethekelela amazwe agoqela eleBelarus, Azerbaijan, Kazakhstan, kanye leSwitzerland emhlanganweni we World Economic Forum eDavos.
Isiphathamandla seCitizens Cabinet, uMnu. Briggs Bomba utshele intathelizindaba ngoMvulo ukuthi kufanele abantu bekhulume ngazwi linye ukukhuthaza uhulumende ukuthi alalele izikhalazo zabo.
Kusenjalo, ikhomishini yeNational Peace and Reconcilliation Commission isixwayise abatshengiselayo kanye lamapholisa ukuthi belondoloze ukuthula, njalo ithi iphakathi kokuxoxisana labaphatheke kuloludaba ukuthi bakhulumisane kuhle.
Ukuhlaziya loludaba, sixoxe loMfundisi Useni Sibanda, isiphathamandla somanyano weChristian Alliance, enye yenhlanganiso ezilenhlelo zokukhulumisana lamabandla aphikisayo, umphakathi, kanye lohulumende ngokulondoloza ukuthula.
