Izakhamizi zeTsholotsho ezisebenza kweleSouth Africa sezisungule umkhankaso wokuvuselela, ukupenda, lokuthengela imithi lemitshina isibhedlela esikhulu seTsholotsho leso abathi sikusimo esesabisayo njalo esidanisayo kakhulu.
Osaphethe isikhundla sikamgcinisihlalo wale inhlanganiso unkosikazi Ellen Ndlovu ozalwa koMakhaza eTsholotsho kodwa osakhe koSiphepha, uthi njengezakhamizi zeTsholotsho kubenza behlise izinyembezi ukubona isibhedlela sabo sesingamanxuwa anjeya.
“ITsholotsho kulusizi. Akulangubo. Akulamakhetheni. Ma ugula ugula ulele embedeni uzutshone omunye ekhangele kungela ukuthi bekuvale. Sathola kungelamtshina wokutester iBP. Labawatshayo bawatsha ngezandla. Imitshina yokuwatsha ayisebenzi. Even amatoilet ayebhalwe ukuthi isambuzi asisebenzi. Sidinga usizo bakithi.”
Unkosikazi Ndlovu uthi ngesikhathi besiyakulesi sibhedlela besiyakupha uncedo ngekhefu lekhisimusi esanda kwedlula, bathola abantwana abagulayo bembethe amathawulo aletha umhelo. Uthi phose yonke into eyenza isibhedlela kuthiwe yisibhedlela ayisekho kuleya ndawo kugoqela ngitsho lengubo lemiqamelo yezigulani sekuzwisa usizi.
Umnumnzana Denis Macala Nkomo odabuka eMngandume koSkhente kuWard 10 obuya abe nguSobhuku kuleyo ndawo, uthi okubakhathaza kakhulu yikuthi lekilinika zakibo koSkente uphahla selwa hobokela. Lokhu uthi kutsho ukuthi umuntu angagula usemelela ukufa njengoba lasesibhedlela esikhulu sekumonyamubambile.
“ITsholotsho mina ngokwazi kwami ngama 90s abantu baberifeywa from eMpilo beyolatshwa khona eTsholotsho plus njalo iyitraining centre yama nurse befundela ukuba ngunurse kumbe ukufundela ukuba ngudokotela. So, ngabe yindawo ekhangelelwa kakhulu mpela okuthi njengoba kuyindawo efundisela amanurse ibe yindawo ehlanyekilezo plus kukhanya lama toilet bathi amatoilet awasebenzi. Kunengi okungasebenziyo esibhedlela seTsholotsho.”
Amalunga enhlanganiso yeNdosakusale agoqela izizalwane zeTsholotsho eziseZimbabwe lezihlala kweleSouth Africa lamanye amazwe, athi afuna ukuvusa lesi sibhedlela sibe ngezinye sezithenjiweyo elizweni. Kodwake umnumnumnzana Khanyisani Ncube ongunobhala wale inhlanganiso uthi ukuze konke lokho bakhwenze badinga uxhaso kuye wonke olesifiso sokuba lesandla ekuvuselelweni kweTsholotsho Hospital.
“Sinanzelela ukuthi iTsholotsho it’s a very rich district inothe kakhulu kodwa sisasilela amuva. Sasesisithi iTsholotsho sizayithuthukisa ngezimali zethu eyiphuma ezikhwameni zethu njengabantu baseTsholotsho. Futhi sizazama nokucela kumadonors izimali. We have got our timber, we have got mineral wealth, sine wildlife i ivory. So, yiwo la ama resources esihlose ukuthi njengeNdosakusa siwasebenzise ukuthi sithuthukise iTsholotsho.”
Okwamanje linhlanganiso isithole usizo lokupenda indlu yokubelethela kulesi sibhedlela kanti bathi bebefisa ukusipenda sonke nxa bengathola uxhaso lwependa enengi.
Linhlanganiso yeNdosakusa ebhaliswe ngokusemthethweni koBulawayo nyakenye, ithi ifisa zonke izakhamizi zeTsholotsho zibe ngamalunga, okuyinto abathi izabapha amandla okuqhuba yonke imisebenzi yentuthuko edingwa ngabantu beTsholotsho.
