Abenhlanganiso yezisebenzi eye Zimbabwe Federation of Trade Unions, abalo budlelwano lebandla leZanu PF, bathi abamankampani kumele babuyisele emsebenzini izisebenzi ezimiswe imisebenzi amahola angamatshumi ayisikhombisa lambili engakedluli.
Amankampani enze lokhu ngemva kwesinqumo esithethwe lidale le Supreme Court kumaviki amabili edluleyo, esiveze ukuba umqatshi angagumula izisebenzi nxa enganikeza isazizo sokwenza lokho esenyanga ezintathu.
Lokhu kuphume emhlanganweni owenziwe lamuhla emini eweteleni yeAmbassador lapho okwakuqala, inhlanganiso ezilwela ilungelo lezisebenzi eye ZCTU leye ZFTU, esezikhuluma ngalizwi linye zisola osekusenziwa ngabaqhatshi ngemva kwesinqumo esethulwe lidale le Supreme Court.
Umkhokheli weZFTU,umnumzana Kennius Shamuyarira utshele intathelizindaba ukuba kunje seliqansile inani lasebexotshwe umsebenzi selisedlula inkulungwane ezilitshumi lasithupha-16,000.
Usole abamabandla ezombusazwe kanye labakuhulumende ngokungazihluphi ukululungisisa loludaba oseluphazamise izisebenzi.
Wakhuthaza umongameli Robert Mugabe ukuba asebenzise amandla akhe ukumisa loludaba hatshi ukukhuluma nje phezu kokuguqulwa komthetho olawula ngezezisebenzi.
Kodwa umnumzana Mlondolozi Ndlovu, oyingcwethi kwezenhlalakahle kazulu, uthi inkulumo kamongameli Mugabe kuyinkulumo nje ngoba kungekho angakwenza njengoba kusobala ukuba inkokheli zisijabulela lesi sinqumo esithethwe kumaviki amabili edluleyo.
Lalokho okukhulunywa ngabe ZFTU, ukuba bezathatha amanyathelo alukhuni aqondane labaqhatshi laba, uNdlovu uthi yikukhuluma nje ngoba kusazakala ukuba uzulu weZimbabwe engeke akwenza lokho.
Zombili lezinhlanganiso zithi yinto emangalisayo ukuba zingasaqakathekiswa izisebenzi njengalokho okumele kube yikho khona kodwa kuqakathekiswa inyamazana okufana lesilwane esaziwa ngelokuthi Cecil, esisanda kubulawa eHwange National Park.
Umhlangano lo ungenwe ngabe ZCTU, ZFTU kanye loze emele ibandla le MDC elikhokhelwa ngumnumzana Morgan Tsvangirai.
Lukhangelelwe ukungena edale le Constitutional Court kusasa loludaba, kukhangelwa isinqumo esithethwe lidale le Supreme Court kudaba lwenkampani ye Zuva Petroleum, kulethemba lokuba omahluli kilo bazaluxazulula kukhangelwa osekubangelwe yisinqumo esithethwe ngaphambilini eHigh Court.