Amalunga enhlanganiso zababalisi ezibalisa eyeProgressive Teachers Union of Zimbabwe (PTUZ) leye Amalgamated Rural Teachers Union of Zimbabwe (ARTUZ) bathi abasoze babe yingxenye yomanyano wenhlanganiso ezimela izisebenzi zikahulumende oweNational Joint Negotiating Council (NJNC) wona ophakathi kokukhulumisana lohulumende besithi awungeke wamela izisebenzi ngoba awuhlanzekanga.
Kunkulumo ezenziwe nguhulumende ngoMvulo iNJNC ibikwa ibilamalunga ayisitshiyagalo lunye akhethwe nguhulumende ukuzamela izisebenzi zenhlanganiso ezedlula ezilitshumi lasitshiyangalombili.
Inkokheli yePTUZ leye ARTUZ eqoqela uMnu. Raymond Majongwe loMnu. Obert Masaraure zithi azisoze zihloniphe izivumelwano ezizaphuma emihlanganweni enziwa nguhulumende le NJNC ngoba bona kabanxuswanga kule imihlangano.
Ekhuluma emhlanganweni weARTUZ, PTUZ lentathelizindaba enkundleni yeAfrica Unity Square ngoLwesibili, umkhokheli weARTUZ, uMnu. Obert Masaraure, uthe imihlangano eyenziwa nguhulumende leNJNC ngamadlwane.
“Thina njenge ARTUZ asiyinanzi iApex Council, asiyinanzi iNJNC ngoba inhlanganiso lezi zombili azihlanzekanga njalo azila ndaba lezifiso zezisebenzi ngakho azingeke zamela abasebenzi. Asisoze sithathe impumela yalokho abazakuvumelana emawofisini abo khonangale.”
Kodwa inhlanganiso lezi zithi amalunga azo akasoze abuyele emsebenzini ngoba abalayo imali eneleyo yokuthi bayesebenza.
I-PTUZ ithi amalunga ayo azakuya emsebenzini asebenze kabili ngeviki okwenyanga yakuqala izikolo zivuliwe benika uhulumende isikhathi sokuthi alungise izikhalazo zabo.
Kodwa unobhala we eARTUZ uthi amalunga abo akasoze abuyele ngoba inengi labo lisebenzela emaphandleni, khatshana lemizi yabo ngakho-ke akwenzakali ukuthi bayesebenza uhulumende nxa engenzanga lokho abakufunayo.
“Abanye bethu bazabe behamba besiya ezikolo okwamalanga amabili ngeviki, kodwa thina sithi hayi abethu abangeke bekukwanise lokhu kutsho ukuthi siyabe silayo phela imali yokuthi sihambe, ukuthi ngihambe nginje ngisuke ngisiya eBinga ngiyehlala amalanga amabili ngiphenduke futhi ngapha, ngiyabe sengidlala. Asidlali.”
Kodwa inengi elikhulumisane leStudio 7 lithi ukungakhulumi ngelizwi linye okwenziwa zinhlanganiso zababalisi kulakho ukuphazamisa imizamo yabo ngemva kokuba iPTUZ ithe ababalisi beyesebenza kabili ngeviki kuthi iARTUZ isithi bengabuyeli.
“Hayi thina siyabakhuthaza sibili laba babalisi ukuthi kabakhulume ngelizwi elilodwa hatshi ukuthi bethi enye inhlanganiso ithi iyabuyela emsebenzini enye ithi ayibuyeli. Lokhu kuzenza uhulumende angenele kube lengxabangxoza, kucine sekukhanya vele ukukhalala umsebenzi abakwenzileyo sekungani akusacaci ukuthi bakwenzelani. Kabakhulume ngelizwi elilodwa, bevumelane into eyodwa yikho ukuthi into le iphumelele.”
Kusenjalo, amalunga enhlanganiso yabodokotela eyeZimbabwe Medical Association babikwa bebekucele likahulumende ngesikhathi abenhlanganiso yabodokotela abasafundela umsebenzi eye Zimbabwe Hospital Doctors Association bebefunga besithi kababuyeli ukungabuyeli emsebenzini.
