amalinks wokungena

Breaking News

Inhlelo Zikazulu Zizamiswa Kungangezelelwa Iholo Lezisebenzi Zikahulumende - Biti


Umphathintambo wezemali uMnu. Tendai Biti uthi nxa iholo lezisebenzi zikahulumende lingakhuphulwa imali yokuziholisa izaqonga okwamagama uhulumende acine esehluleka ukwenza inhlelo zikazulu ezikhangelane lezempilakahle, imfundo, ukulungisa imigwaqo lokunye okutshiyeneyo.

UBiti wethulele inkokheli yelizwe ugwalo olujulileyo ngoLwesithathu eyicebisa ukuthi kungakhuphulwa iholo lezisebenzi kuzabe sokufuneka izigidi ezedlula ikhulu lamadola eMelika ngenyanga yokuholisa izisebenzi kukanti-ke okwamanje kusetshenziswa izigidi ezedlula amatshumi ayisikhombisa zamadola eMelika.

Kugwalo lolu uBiti uphinde wathi nxa kungafakwa amapentsheni, kubhadalwe imali yezempilakahle yezisebenzi - imedical aid – lokunye okutshiyeneyo, kuzabe sokufuneka izigidi ezingamakhulu amane zamadola eMelika kuluhlu lokusebenzisa imali kahulumende, iBudget.

Uphinde wathi izigidi ezedlula ikhulu lamatshumi ayisithupha zamadola eMelika etholwe ekuthengiseni amadayimana eMarange kayisoze incede kangako ekuholiseni izisebenzi.

Ingcwethi kwezenotho uMnu. Bekithemba Mhlanga uthi kumele kugunyulwe izisebenzi ezingaziwayo kuhulumende njalo kuhlolisiswe umumo womnotho weZimbabwe kungakakhuphulwa imali yezisebenzi.

XS
SM
MD
LG