Inkampani ye Air Zimbabwe elabatshayeli bendizamtshina abaqale ukukhalala umsebenzi ngeviki ephelileyo, bekhonona ngeholo eliphansi abalitholayo kanye lemali zama allowance eziphansi, isimise inhambo zendizamtshina zayo eziya kwamanye amazwe.
Abazi ngokwenzakalayo bathi iAir Zimbabwe imise indizamtshina eziya eBhilithane, China, Zambia kanye le Democratic Republic of Congo.
Inkampani le isiqhatshe iAir Quarius ye South Africa ukuthi isebenze lapho ejayele ukuphaphela khona okunjenge South Africa kanye lezinye indawo ze Zimbabwe ezenza imali ethe xaxa.
Osomabhizimusi bathi ukuswelakala kwendizamtshina ze Air Zimbabwe kubabisela muva ekqhubeni ibhizimusi yabo lamankampani akwamanye amazwe.
Kodwa umsekeli kanobhala jikelele wenhlanganiso yezisebenzi eye Zimbabwe Congress of Trade Unions, uMnumzana Japhet Moyo, utshele uGibbs Dube we Studio 7 ukuthi abaqondisi be Air Zimbabwe bancindezela izisebenzi okwesabekayo.
