Inkampani ye Air Zimbabwe emise ukuphaphisa indizamtshina yazo ngoZibandlela ngenxa yokusindwa yizikwelede, iqalisile ngoLwesithathu ukuthwala uzulu ngendizamtshina esuke kobulawayo isiya eharare ithwele abantu abathathu.
Umnu. Gorden Moyo umphathintambo wezamafekithali kahulumende utshele iStudio 7 ukuthi lokhu osokusenziwa yi Air Zimbabwe kuyamangalisa ngoba uhulumende ubesayidingela inkampani yokusebenza layo ukwenzela ukuthi yenze imali yokuyithuthukisa.
UMoyo uthe iAir Zimbabwe ikhangelelwe ukuthwala uzulu okwesikhathi esifitshane ingakasebenzi lenkampani edingwa nguhulumende.
Indizamtshina zenkampani le ezizabe zisedlula eVictoria Falls, zizaphaphela koBulawayo ledolobho le Harare kathathu ngeviki.
Beziphapha endaweni ezifanayo zisenzela ukuthi uzulu ahambe embukisweni omkhulu we Zimbabwe International Trade Fair okade usenzelwa koBulawayo.
Inkampani ye Air Zimbabwe ilezikwelede ezedlula izigidi ezilikhulu lamatshumi amane amadollar eMelika.
UMoyo uthi selidumela emansumpeni ukuthi inkampani ye Air Zimbabwe yakudala ivalwe kusungulwe elohlonzi.
Umnu. Rejoice Ngwenya ingcwethi kwezenotho uthi kuyamangalisa osokusenziwa yinkampani le.
