Inkampani yeDelta Corporation epheka utshwala lamanamunede ithi kusukela nyakenye kuze kuyefika umbimbitho lonyaka ithole inzuzo yezigidi ezedlula amatshumi amahlanu zamadola eMelika ekuthengiseni utshwala lamanamunede eZimbabwe.
Umqondisi wayo uMnu. Canaan Dube uthi uzulu uthakazelele utshwala obuphekwa yinkampani le ikakhulu obembodlela kanye lamanamunede atshiyeneyo.
Uthi ilizwe lithole umthelo ongaba yizigidi phose ezilikhulu zamadola-US$98 million, ozancedisa ukuthuthukisa inotho.
Uphinde wathi inkampani yakhe isizaqalisa ukuziphekela amahewu ekade iwathola kwele Zambia.
Ingcwethi ecubungula inhlalo kazulu uMnu. Peter Zwide Kalanga Khumalo uthi loba nje utshwala busiza ukuthuthukisa inotho yelizwe, kulezinye imuli ezithwala nzima ngabazali ababunatha bedlulise amalawulo.
