Inkampani ye Impala Platinum yakwele South Africa isivumile ukulandela okufunwa ngumthetho we indigenization othi kumele amankampani emazweni abele uzulu amashares angaba yisilinganiso sokungamatshumi abahlanu ekhulwini.
Umphathintambo wezokuthuthukisa inotho kazulu uMnu. Saviour Kasukuwere uthi inkampani le ithi izakwabela amashares ayisilinganiso sokulitshumi ekhulwini, ekuthuthukiseni inotho yabantu abahlala duzane lemigodi ye Zimbabwe Platinum Holdings, isilinganiso esifanayo kuzisebenzi kuthi-ke ayisilinganiso sokungamatshumi amathathu lanye ekhulwini, afakwe esikhwameni sikahulumende seWealth Creation Fund.
Umnu. David Brown umqondisi we nkampani ye Implats yakwele South Africa uthe bavumile ukwenza lokhu loba nje kusasele ukuthi amashares la azabhadalwa njani nguhulumende.
Esethula impumela yalomhlangano owenziwe yinkampani le lohulumende, uMnu. Khotsho Mokhele umgcinisihlalo we Implats eyiyona nkampani enkulu esebenzalana leye iZimplats utshele intatheli ukuba lumhlangano wangolweSibili usugqibe ukufuthelana obe sokukhona phakathi kwabenkampani yakhe lohulumende.
Kusenjalo, inhloko kahulumende uMnu. Morgan Tsvangirai uthi uzakwenza umhlangano oqakathekileyo labaphathintambo bakahulumende ababona ngezokuthuthukisa umnotho welizwe kanye lenotho kazulu ukwenzela ukuthi kudingwe indlela ezingcono zokwabiwa kwamashares amankampani emazweni ngaphansi komthetho weIndigenization.
Umnu. Luke Tamborinyoka isikhulumeli sika Mnu. Tsvangirai uthe inhloko kahulumende kayivumelani lokwenziwa nguMnu. Kasukuwere ohlukuluza amankampani emazweni.
UTamborinyoka uthi ukuchathamela amankampani ezemigodi alethela ele Zimbabwe imali yomthelo enengi okwamagama kufana lokubulala inkomo eyehlisayo.
Umnu. Nhlanhla Dube isikhulumeli sebandla le MDC ekhokhelwa nguMnu. Welshman Ncube uthi uMnu. Kasukuwere akumelanga abenguntando kayiphikiswa.
Inkampani ye Implats Isivumile Ukwabela Uzulu Amashares Phansi Komthetho we Indigenisation
- Gibbs Dube
