Inkampani ye American General Supplies ithethe indizamtshina ye Air Zimbabwe eLondon ngenxa yesikwelede sensimbi lokunye okutshiyeneyo ekade sesisedlula isigidi samadola eMelika.
Umgcinisihlalo we board ye Air Zimbabwe uMnu. Jonathan Kadzura uthi indizamtshina le ibanjwe ekuseni ngoMvulo ngabe General Supplies isanda kufika eGatwick International Airport.
UKadzura uthi okwamanje sebedinga imali yokuhlenga indizamtshina le ingakathengiswa.
Uthi ukuthathwa kwe Boeing 767-200 kubangelwe yikuthi ugatsha lwezemali oluphethwe nguMnu. Tendai Biti alufuni ukunika imali yokusebenzisa ingatsha ezikhokhelwa ngabaphathintambo ababebandla le ZANU PF.
UBiti ukewatshela uzulu ukuthi inkampani ye Air Zimbabwe kumele ithengiswe ukuze isebenze ithola inzuzo yokuthi yenelise ukusebenza izimele.
Inyathelo lokuthathwa kwendizamtshina le eLondon kulandela okwenziwe yinkampani ye Bid Air Services yakwele South Africa kumaviki asanda kwedlula ebambe indizamtshina ye Air Zimbabwe ngenxa yesinye njalo isikwelede senkulungwane ezingamakhulu amahlanu amadola.
Ingcwethi kwezenotho uMnu. Rejoice Ngwenya uthi akumelanga abaqondisi be Air Zimbabwe bagcone uMnu. Biti ngokudilika kwenkampani le.
Inkampani ye Melika Efuna Ukubhadalwa Isikwelede seUS$1.2 Million Ibamba Indizamtshina ye Air Zimbabawe
- Gibbs Dube
