Inkampani epheka amanamnede kanye lotshwala eyeDelta Corporation ithi isizabhadalisa abawoda kuyo ngedollar leMelika ngoba kuyiyo ethenga ngayo impahla zokusebenzisa kumankampani aphandle kwelizwe.
Embikweni ewethule ngoLwesithathu inkampani le ithi ayitholi imali yakwamanye amazwe eneleyo kuhulumende osokuphazamisa umsebenzi wayo.
I-Delta Coporation ike yathi isivala amafekithali ayo ngenyanga edluleyo ngenxa yokuswelakala kwemali yakwamanye amazwe, okubangele ukuthi inengi liswele amanye amanamnede ngekhefu leKhisimusi, kodwa yasiqhubeka ngomsebenzi ngemva kokungenela kukahulumende.
Ukuhlaziya loludaba, sixoxe loMnu. Albert Mhlanga, ongusomabhizimusi njalo eyisiphathamandla sebandla leMDC, yena othi kusobala ukuthi umnotho welizwe usuziguqula ukuthi usebenzise idola leMelika-i-dollarisation.
