Inkampani yeMimosa Mine isihlenge abane abemba igolide emgodini we Antenior Gold Mine eGwanda abadilikelwe ngumgodi ngolweSihlanu.
UMnumzana Buletsi Nyathi owenhlanganiso yeYouth in Mining Council of Zimbabwe uthi abane laba bakhutshwe emgodini lo ngoLwesibili ebusuku bahanjiswa esibhedlela seGwanda bekhala ngamanxeba langendlala.
Abaphume emgodini lo bephila nguAmen Mahlangu, Mkhululi Dube, Bheki Ndebele lo Nefasi Dube.
U Nyathi utshele uGibbs Dube weStudio 7 ukuthi abangane babo ababili uMnumzana Sabelo Ngwenya loMnumzana Jabulani Nkoma bacatshangelwa ukuthi bafele emgodini lo ngakho-ke sebengcwatshwe okusemthethweni langosiko lwesintu.
Izihlobo labangane zihlangane emgodini lo ngoLwesibili zavalelisa ababili laba okukhanya engani bawelwa ngamatshe amakhulu bahle baphela umphefumulo.
Umgodi lo wawungoka Mnumzana Douglas Starling oweGwanda kodwa ubikwa usungoka Mnumzana Farisi Siduli ocatshangelwa ukuthi ngumlandeli omkhulu webandla le Zanu PF.
