Sekube lokukhumisana umlotha phakathi kwenkampani ye Gushungo Holdings leNestle Zimbabwe evale kuliviki ikhonona ngokuhlukuluzwa yizimeli zepulazi likankosikazi kamongameli Robert Mugabe eleGushungo Holdings, abasekeli bebandla le Zanu PF kanye lamapholisa abekade beyethesa umlandu wokwala ukuthenga uchago oluvela kulinkampani.
Umphathintambo wogatsha luka hulumende olwe Industry and Commerce uMnumzana Welshman Ncube uthi kube lomhlangano phakathi kwenkampani zombili, izimeli zika hulumende, amankampani apheka uchago kanye labe Standards Association of Zimbabwe lapho okuvunyelwane khona ukuthi inkampani yeNeslte kumele ithenge njalo uchago lwe Gushungo Holdings oluzafakwa endaweni lapho oluzathathwa ngamankampani wonke.
Umnu. Ncube utshele uGibbs Dube we Studio 7 ukuthi lokhu kuzenza ukuthi inkampani ye Nestle yenze umsebenzi wayo ingaphazanyiswa yiGushungo Holdings.
Uphinde wathi uhulumende uzafaka abakhangelane lezomthetho kuleyonkampani ekhangelelwe ukuthi izaqalisa ukupheka uchago kunsukwana ezizayo.
Inhlanganiso zamabhizimisi ezinjenge Zimbabwe National Chamber of Commerce, Chamber of Mines kanye le Confederation of Zimbabwe Industries zithi kuyajabulisa ukuthi inkampani lezi sezikhumelane umlotha phakathi kwesikhathi okukhangelelwe ukuthi kube lamankampani amanengi avela emazweni atshiyeneyo azevula amabhizimisi eZimbabwe.
