Inkampani yamafutha ezimotha eye National Oil Company of Zimbabwe (NOCZIM) ithi isikhulumisana lo hulumende ukwenzela ukuthi ithengise amashares kahulumende akunkampani le ayisilinganiso sokungamakhulu amane lasitshiyagalo lunye ekhulwini-48%, ukwenzela ukubhadala izikwelede.
Inkampani ye NOCZIM ilezikwelede phose izigidi ezingamakhulu amathathu zamadola eMelika zamankampani anjenge Zimbabwe Revenue Authority, Libya Arab Foreign Bank, Nordbanken kanye le Companhido Pipeline Mozambique.
Inkampani le ibikwa ifuna ukugumula izisebenzi lokwekela inhlelo ezinjengokuhlanyela izihlahla ze jatropha, igwayi kanye lamaluba ukwenzela ukuthi ikhangelane lokuthenga langokuthengisa amafutha ezimota.
Umnu. Rejoice Ngwenya ingcwethi ecubungula ezenotho utshele uGibbs Dube we Studio 7 ukuthi inkampani le ingeke yenelise ukuthengisa amashares la ngoba akulamuntu ongathenga amashares la ekwazi ukuthi kasoze ayibambe esidukwini.
Kusenjalo, isikwelede seZimbabwe siqonge safika kumabillion phose ayisithupha samadola eMelika kusukela ngoZibandlela kusiya ngoMbimbitho lonyaka.
Ibhanga elikhulu lelizwe iReserve Bank of Zimbabwe lithi isikwelede lesi siqonge ngezigidi ezilitshumi lane zamadola eMelika.
Umnu. Masimba Kuchera umgcinisihlalo wenhlanganiso ye Zimbabwe Coalition on Debt and Development utshele uGibbs Dube we Studio 7 ukuthi isikwelede lesi kumele sibhadalwe masinyane ngoba siqhubeka sizala umthelo we interest rate.
