Abakhokheli bamabandla akuhulumende womanyano bahlangene ngoMvulo bakhulumisana ngogwalo olulezixwayiso abalunikezwe ngamaqula amela amabandla abo kunkulumo zokuzama ukulungisisa okuhluphayo kuhulumende lo.
Abamela iZanu PF lamacele womabili eMDC kunkulumo lezi banikeze uMongameli Mugabe, uMnu Morgan Tsvangirai loMnu Arthur Mutambara ugwalo lolu ngeviki edluleyo bebazisa ngokuthi kuyini asebevumelene phezu kwakho.
Babaxwayise njalo ngokuthi kuyini abamele bakwenze ukuze kuqedwe ukudonselana okukhona kuhulumende. Abazi ngokwenzakalayo bathi abakunkulumo bakhuthaze ukuthi osibalukhulu bezabelo abavela kuMDC befungiswe beqalise umsebenzi.
Bakhuthaze njalo ukuthi kumele uMugabe, uTsvangirai loMutambara babize umhlangano lentathelizindaba bacele amazwe ethulele iZimbabwe izijeziso ukuthi ezesule. Umsekeli kaTsvangirai, uNkosazana Thokozani khupe uthi ukuze izijeziso lezi zisuswe kumele iZanu PF ivumele umbuso okhululekileyo elizweni.
Lanxa sokube lokuvumelana entweni ezitshiyeneyo, kusalokudonselana okukhulu phezu kodaba lukasibalukhulu webhanga elikhulu lelizwe uMnu Gideon Gono legqwetha likahulumende uMnu Johannes Tomana. Umhlangano weZanu PF congress unqume ngempelasonto ukuthi ibandla leli lingavumi ukuthi ababili laba besuswe ezikhundleni zabo njengalokhu okufunwa yiMDC.
Igcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi iZanu PF kumele ivume ukuthi uGono loTomana besuswe ezikhundleni zabo ukuze kulungisiswe okuhluphayo kuhulumende womanyano.
