amalinks wokungena

Breaking News

Crisis in Zimbabwe Coalition: Kakukhulunywe Ngobukhokheli Obuqotho kuAU


Inhlanganiso ye Crisis in Zimbabwe Coalition isikhuthaze inkokheli zamazwe eAfrica ezizongena umhlangano we African Union kweleSouth Africa ukuthi zikhulume kabanzi ngobukholeli obuqotho.

Amalunga ale inhlanganiso atshele abezindaba eJohannesburg ngoLwesine ukuthi kawakukholwa ukuthi iAU izimisele ukuqhuba imibuso ehlonipha intando kazulu eAfrica ngesikhathi ikhokhelwa ngumongameli Mugabe oseyehlulekile ukwenza lokho elizweni lakhe.

Embikweni owethulwe kwabezindaba eJohannesburg lamhlanje, amalunga enhlanganiso yeCrisis in Zimbabwe Coalition athe kawathokozi ngodaba lokuthi inhlanganiso ye African Union iqhubeka isenza sengathi kayiboni ukuthi ukwephulwa kwamalungelo oluntu kuqhubekela phambili eZimbabwe.

Linhlanganiso ithi ukunyamalala kukamnumnzana Itai Dzamara, owaduma kakhulu ngokuthi umongameli Mugabe ehle esihlalweni kanye lecebo lokuthumela amasotsha ukuyakhupha ngodli abangela misebenzi abaphila ngokuthengisa ezitaladeni, yizizatho ezibambekayo obekufuze zitshengise iAU ukuthi umongameli Mugabe akasifanelanga lesisikhundla.

Isikhulumeli senhlanganiso ye Crisis umnumnzana Mfundo Mlilo uthi sekuyisikhathi sokuthi inkokheli zeAfrica zingabi ngomaluma bephozisa kodwa zilibeke obala iqiniso lokuthi akekho ongabayintshantshu ekubhuleni umlilo komakhelwana eyakhe indlu isitshe yaba ngumlotha.

Osaphethe isikhundla sikamgcinisihlalo wenhlanganiso ye Crisis unkosazana Samukeliso Khumalo, uthi bayakhathazeka ngokuthi indaba zonke umongameli Mugabe azama ukuzixazulula emazweni eAfrica yizo futhi ayekela zisenzakala elizweni lakhe.

Igqwetha elimela amalungelo oluntu omnumnzana Gabriel Shumba laye obeyingxeye yabethule inkulumo kulo umhangano, uthi ingxoxo okukhethwe ukukhulunywa ngazo kulo umhlangano zikhombisa sobala ukuthi inkokheli zeAfrica zigegelela imbuya zisesaba ulude.

Le yinto egcizelelwa ngtumgcinisihlalo wenhlanganiso ye Zimbabwe Community in South Africa umnumnzana Ngqabutho Mabhena, yena othi bafuna iAU ikhangelisise kabanzi indlela okukhethwa ngayo abakhokheli bale inhlanganiso.

Lobanje umhlangano we25th African Union Summit, uqale ngeNsonto edlulayo, oMongameli bamazwe eAfrica bona bakhangelelwe ukuqhuba owabo umhlangano mhlaka 14 lo 15 Nhlangula.

XS
SM
MD
LG