Inkokheli ye Zanu PF ibikwa yathola izikwelede ezemali enengi ebhanga elikhulu lelizwe iReserve Bank of Zimbabwe kusukela ngomnyaka ka 2003 kusiya ku 2008.
Inkokheli le ibikwa yenelisa ukuthola izikwelede lezi ngokwazana losibalukhulu webhanga leli uMnu. Gideon Gono labanye bakhe abakubandla le Zanu PF.
Imali zakhona zibikwa zafakwa libhanga leli kwamanye amabhanga eZimbabwe lakwamanye amazwe.
Umnu. Themba Mliswa ubikwa wathola izigidi ezedlula ezintathu zamadola eMelika. Inengi lenkokheli eyathola limali ibikwa isisehluleka ukubhadala izikwelede lezi ezibikwa ziyizigidi lezigidi zamadola eMelika.
Inhlanganiso ezizimele zodwa zifuna ukuthi kudingwe inkampani ezakhangela loludaba ukwenzela ukuthi abantu laba babisele imali kahulumende.
Lokhu kwenzakala ngesikhathi iqula labaqondisi bebhanga leli lisithi kumele ibhanga le RBZ ligumule izisebenzi ezingaba zinkulungwane lenxenye njengoba lisehluleka ukuziholisa.
UMnu. Masimba Kuchera umsekeli womgcinisihlalo we Zimbabwe Coalition on Debt and Development utshele uGibbs Dube oweStudio 7 ukuthi udaba lolu sokumele ludingisiswe ngamandla.
