Inkulumo phakathi kwamankampani endizamtshina eye Air Zimbabwe leye China ngokuvuselela iAir Zimbabwe zibikwa sezimisiwe.
Lokhu kungenxa yokungavumelani okube khona phakathi kukahulumende lenkampani le ngokubhadalwa kwesikwelede seAir Zimbabwe sezigidi ezedlula ezilikhulu zamadollar eMelika.
UMnu. Patson Mbiriri unobhala wogatsha lwezokuhambisa utshele inhlanganiso yezindaba eye ZIANA ukuthi inkulumo lezi zisanda kumiswa njengoba kwehlule ukuvumelana langendlela yokuthenga amashares e-Air Zimbabwe.
UMbiriri walile ukutshela iZIANA okunengi ngaloludaba loba nje okubikwa kutshaye uhulumende inhliziyo yikuthi iHainan Airlines ibifuna amashares angaba yisilinganiso esedlula esingamatshumi ayisithupha ekhulwini-65% senkampani yeAir Zimbabwe.
Uhulumende ubefuna ukuthi inkampani le ithenge amashares ayisilinganiso sokungamatshumi amane lanhlanu ekhulwini-45% njalo ibhadale lesikwelede sonke se Air Zimbabwe.
Inkampani ye China le ibifuna njalo ukuthi kungabi leziphathamandla zikahulumende ekuqhubeni umsebenzi weAir Zimbabwe nsuku zonke.
Inkampani ye Air Zimbabwe ithwele nzima ngezikwelede eseziyenze ukuthi imise inhambo zendizamtshina yazo emazweni lapho ezingabanjwa khona ngamankampani afuna ukubhadalwa izikhwelede.
Ingcwethi kwezenotho uMnu. Rejoice Ngwenya uthe ukuthi kumele uhulumende asebenzise iPrivatization Agency of Zimbabwe ukuthi kudingwe amankampani angasebenzelana le Air Zimbabwe ukuze ivuselelwe.
