Umphathintambo wezemali uMnumzana Tendai Biti uthi inotho yelizwe ikhangelelwe ukuthuthuka lonyaka ngesilinganiso esingaba phose ngokulitshumi ekhulwini.
Ekhuluma ngolweSine emhlanganweni wabosomabhizimusi leziphathamandla zikahulumende, uMnumzana Biti uthe ukuthuthuka kwenotho lokhu kungabe kubangelwe yisivuno esiphezulu segwayi lonyaka kanye lokuthuthuka okade kungacatshangelwa kumafekithali, kwezenjiwayo kanye lezokwethekelelwa kwelizwe.
Uthe esethula ibudget ka 2010 nyakenye, uBiti ubethe inotho ilakho ukuthuthuka ngokwedlula kancane okuyisikhombisa ekhulwini-7,7%.
Waphinda wehlisa lesisilinganiso ngoNtulikazi sayafika phose kokuhlanu ekhulwini.
Ingcwethi kwezenotho zithi akwenzakali ukuthi inotho ithuthuke ngendlela uBiti akhangelele ngayo njengoba lokhe kulukuxokozela ezweni njalo amankampani emazweni akaqalisi ukuvula amafekithali eZimbabwe.
Eyinye yalezingcwethi, uMnu. Rejoice Ngwenya, utshele uGibbs Dube we Studio 7 ukuthi inotho yelizwe ilakho ukuthuthuka kancane lonyaka.
