Kulandela inyathelo likahulumende elokumisa okwesikhatshana uhlelo lokunikeza ama licence anika abantu imvumo yokulima insangu, inengi lithi bekuvele kufanele ukuthi uhulumende aqale edingisise ngaloluhlelo andubana anxuse abantu ukuthi bedinge imvumo yokuphatheka kulo.
Kubikwa abantu abangamakhulu amathathu lanhlanu 350 besebelobe incwadi zokudinga ama licences, wona abiza amadola azinkulungwane ezingamatshumi amahlanu $50,000 eyodwa.
Insangu zikhangelelwe ukusetshenziswa ukwelapha imikhuhlane ethile lokunye.
Umsekeli kamphathintambo obona ngezemali uMnu. Terrence Mukupe utshele iStudio 7 ukuthi uhulumende usemise loluhlelo ngoba esadingisisa okunengi ngalo, okugoqela ukuluhlolisisa kanye lokudinga indlela azaluqhuba ngayo.
Ukuhlaziya inyathelo elithethwe nguhulumende, sixoxe loMnu. Thandeko Zinti-Mnkandla, ingcwethi kwezokulima kanye lamasiko yena othi ngempela, uhulumende ubambe inhlwa ngekhanda.
