Intathelizindaba eyake yaba ngumhleli wephephandaba likahulumende ele The Sundaymail, uEdmund Kudzayi, usethule athi yibufakazi obutshengisa ukuthi ugatsha lwezokhetho, olwe ZEC, lwasetshenziswa njani ukwethula impumela engayisiyo yeqiniso.
UKudzayi wethule umfanekiso kamabonakude olesihloko esithi Excelgate athi utshengisa ukuba umgcinisihlalo we ZEC, uNkosikazi Priscilla Chigumba waqamba amanga aze athi ugatsha lwakhe lwafakaza ngokuzibonela amaphepha alempumela, athiwa ngama V11, awezindawo zokuvotela eziyinkulungwane ezilitshumi, 10 000.
UKudzayi uthi lokhu akungeke kwenzakala ngoba ama ama V11 angeke afika kugatsha lwe ZEC kungelamvumo yomthethwandaba.
UKudzayi wethule ubufakazi obutshiyeneyo athi bukhomba ukuthi kwaba lokuqilibezela kukhetho.
Kodwa phansi kwesisekelo sombuso akulamthethwandaba ongemukela loludaba nxa lungasiwo kwezomthetho ngoba indaba zokhetho zonke kumele zahlulelwe kungakedluli umnyaka owodwa.
Sokulomnyaka lokhu kungaziwa ukuthi kahle-kahle uMngangwa wangqoba ngamavoti amangaki njalo lezizatho zomthethwandaba zokuthi kungani loludaba lwahlulelwa njalo azikatholakali.