amalinks wokungena

Breaking News

Intathelizndaba Zibhubhudla Igwebu Phezu Kodaba Lwe Econet le Steward Bank


UMnu. Strive Masiyiwa umnini we Econet

Intathelizindaba namhlanje zivimbe iziphathamandla zeEconet leSteward Bank ukwenza umhlangano obujonge ukuchasisa ungenelwa kwenhlanganiso yezindaba eye The Source izolo eHarare.

Ubuqholo bukaNyambirayi esala ukuxolisa buthelele ulaka intathelizindaba ebezisedlula amatshumi amahlanu. Zabopha imilomo ngamalembu amanyama, ziphethe amabhakana alotshwe imibiko esola ukuphazanyiswa komsebenzi wazo, okudale ukuthi ehluleke ukwethula umbiko abeze ngawo uNyambirayi.

Zihle zavusana lequla likaNyambirayi, ebelibalisa uMnu. Lance Mabondiyani loMnu. Tinashe Zindi, zathi jwamu zonke zaphuma kulowo mhlangano sikhathi sinye, zisemba phansi ukuba kazisoze zalalela okuzekwethulwa kungela kuxolisa kuqala.

Zithi isenzo salenkampani yikuphambana lokutshiwo yisisekelo sombuso esipha intathelizindaba amandla wokuvikela ababatholisa indaba abazilobayo lokuba zingaze zabaveza noma sekunjani.

Ukwenza kwalezi ziphathamandla kusolwe ngokuphindiweyo zinhlanganiso ezilwela ilungelo lazo okubalisa eye Media Institute of Southern Africa – Misa Zimbabwe labe Zimbabwe Union of Journalists – ZUJ.

Unobhala jikelele we ZUJ uFoster Dongosi uthi kuyayangisa okwenziwe yilenkampani izolo ngoba yikwephula ilungelo lezintathelizindaba elizweni, bethi akumelanga kuvunyelwe kuqhubekela phambili ngoba kulakho ukuzaphazamisa ukusebenza kwazo kwelakusasa.

Ukwala ukungena umhlangano kwentathelizindaba, ngemva kokuqholoza kweziphathamandla ze Econet uDongosi uthi kube linyathelo eliyilo.

Intathelizindaba ezinengi zitshengise ukukhathazeka ngokwenza kwe Econet. Okugoqela uMnu. Jeffery Moyo intathelizindaba esebenza izimele othi akumelanga ivunyelwe linkampani ukwenza intando yayo ngoba kuzaphazamisa ukusebenza kwazo ngesikhathi esizayo, sekunzima ukuziloba izindaba,lozulu esengenwe yikwesaba ukutsho umbono wakhe ngoba esazi ukuba kuzamngenisa enkingeni.

UMnu. Senzo Maseko yena uthi besingekho isizatho sokuba baqholoze abe Econet laba ngoba kuyibona ababizele lumhlangano befuna ukuzigeza kulokho abakwenze kunkampani ye The Source, bephatha intathelizindaba okwensane.

Beziganu nwabu intathelizindaba lamuhla ekuseni kulomhlangano ongasenziwanga zibeka abe Econet le Steward Bank, umlandu wokufuna ukwenza ingani yibo abanikazi bomthetho, bezenza amapholisa kanye labomahluli, zisithi lokhu yikweyisa isisekelo sombuso kanye lomsebenzi ophathwa zintathelizindaba eZimbabwe.

Intathelizindaba yethu uMavis Gama usethulela loludaba ngokugcweleyo.

XS
SM
MD
LG