Intengo yephethulo ledizili ilakho ukuqansa yiloba nini kulandela ukukhwezwa kwesilinganiso amankampani athengisa amafutha ezimota abethenga ngaso idola leMelika ebhanga elikhulu lelizwe eleReserve Bank of Zimbabwe (RBZ).
Lelibhanga belithengisela abankampani la idola leMelika ngesilinganiso esilinganayo, ese “one-is-to-one.”
Lokhu kutsho ukuthi abethenga idola leMelika elilodwa ngeBond elilodwa. Kodwa embikweni awethule ngoMvulo, usibalukhulu weRBZ uMnu John Mangudya uthe kuqala ngoLwesibili, amagalaji lawa asezathenga idola leMelika ngesilinganiso esiyabe silawulwa ngumkambo wemali, iInter-Bank Exchange Rate.
Lokhu kucunule abathengisa amafutha ezimota laba, njalo bathi balakho ukukhuphula intengo yawo ngoba indleko yokuthenga imali yeMelika isikhwelile. Ngakolunye uhlangothi, uhulumende wazise ngoMvulo ukuthi useyehlise imbadalo yokugada amabhasi akhe eZupco ngesilinganiso sengxenye ekhulwini.
Sixhume usomabhizimusi uMnu Abednico Bhebhe yena obelegalaji elithengisa iphethulo ledizili, wasephuma ngoba esithi akulanzuzo.
Kambe kungani umnotho welizwe ulokhu usiya nganxele lanxa uhulumende kamongameli Mnangagwa wathatha umbuso kowayengumongameli uMnu. Robert Mugabe esithi ngoba yena uzalungisa umnotho welizwe? Kwehlulani? Sihlaziya loludaba siloMnu. George Mkhwananzi, ingcwethi ecubungula ezomnotho welizwe kanye lezombusazwe.
Kodwa umpathintambo obona ngezemali uMnu. Mthuli Ncube uthi abantu kufanele bethembe uhulumende kamongameli Mnangagwa owe “new dispensation” ngoba uzimisele ukulungisa umnotho welizwe ngenhlelo ezintsha asezisungule. Umongameli Mnangagwa laye uhlezi egcizelela ukuthi um