Isilinganiso semali esebenzayo emkambo wemali owe Zimbabwe Stock Exchange ikhanya iqonge kancane kulezi nsukwana kulandela ukukhulumisana phakathi kuka hulumende womanyano lamankampani emazweni alamafekithali eZimbabwe akade esesesaba ukufaka imali emkambo lo ngenxa yohlelo lwe indigenization.
Umkambo lo okade ususebenza ngenxenye yesigidi kuphela samadola eMelika (US$500 000) ngelanga kusanda kwethulwa loluhlelo ekuqaliseni kuka Mbimbitho, ubikwa ususebenza ngezigidi ezedlula kancane ezimbili zamadola emelika (US$2.3 million) ngelanga.
Umnu. Walter Mbongolwane, ingcwethi ecubungula ezenotho utshele uGibbs Dube we Studio 7 ukuthi ukuthuthuka kwenotho emkambo lo kungaphela njengamazolo nxa kulokudonselana kuhulumende womanyano ngohlelo lolu.
