amalinks wokungena

Breaking News

Kukhupha Okumangalisayo Intengo Yempahla Ezitolo


Impahla ezitolo

Intengo yempahla ezitolo iqhubeka ikhuphuka kakhulu osekubangele ukuthi inhlanganiso elwela ilungelo lezisebenzi eyeZimbabwe Congress of Trade Unions (ZCTU) ithi abaqhatshi kumele bengezelele iholo lezisebenzi ngesilinganiso esifika amakhulu amahlanu ekhulwini.

IZCTU ithi intengo isikhuphuke ngesilinganiso esikhulu osekusenza izisebenzi, inengi lazo elihola imali engaphansi kwamakhulu amathathu, zehluleke ukunakekela lemuli yazo.

Eyinye impahla efana lesamende ibingasabonakali kodwa khathesi lapho etholakala khona intengo isikhuphukile. Isaka ebelisenza $12 selitholakala kwezinye indawo selisenza $25.

Kuthi koBulawayo ngoMvulo inyama yenkukhu ibisitholakala nzima.

Umkokheli wenhlanganiso elwela ilungelo labesifazane eyeWomen of Zimbabwe Arise, uNkosazana Magodonga Mahlangu, utshele iStudio 7 ukuthi intengo yempahla isikhuphuka okungapheliyo ezitolo.

Uthi lokhu sosekusethusa abantu.

Abanye bathi intengo ikhuphulwa yikuqina kwesisindo semali yohlobo lwe bond nxa liqathaniswa ledolo leMelika.

Ingcwethi ecubungula ezombusazwe uMnu. Thandeko Zithi Mkandla uthi kukhanya intengo yempahla ezitolo iqale ukukhuphuka ngamandla ngemva kokugcotshwa kukaMongameli Emmerson Mnangagwa.

Kodwa umsekeli webandla leZanu PF, uMnu. Believe Gawule, uthi abantu bengasoli uhulumende ngoba engakaqali umsebenzi ngokuqotho njengoba ledale leCabinet lingakakhethwa.

Ukukhuphuka kwentengo lokhu kuza ngesikhathi amanye amafekitali, ikakhulu awokwemba, esevala kuxotshwa izisebenzi ezinengi.

please wait

No media source currently available

0:00 0:04:41 0:00

Facebook Forum

XS
SM
MD
LG