Ukuqonga kwentengo ezitolo kuyaqhubeka elizweni ngesikhathi umnotho welizwe ulokhu uswela uncedo lwamanye amazwe.
Lokhu kwenzakala ngesikhathi inhlanganiso elwela ilungelo likazulu, eye Consumer Council of Zimbabwe, isithi imuli elabantu abahlanu isifuna ukondliwa ngemali engamadola angamakhulu ayisitshiyagolumbili, $800 ngenyanga.
Umphathintambo wezemali, uMnu. Mthuli Ncube, usephendukile elizweni evela kwele Switzerland emhlanganweni weWorld Economic Forum eDAVOS. Uphenduke elengise izandla.
Idale labaphathintambo, iCabinet, belilomhlangano ngoLwesibili lapho okwethule impumela yohambo lukaMongameli Emmerson Mnangagwa emazweni awe Easten Europe agoqela ele Belarus, Kazakistan le Russia.
Okuphumileyo kuhambo lolu lolukamphathintambo wezemali ngokufana losekuke kwethulwa nguMnu. Robert Mugabe esabusa; izivumelwano ezingela lutho olubambekayo.
Lokhu kutsho ukuthi umnotho welizwe uzahlala ulokhu umi manzonzo ngapha umnotho usiya nganxele uzulu edubeka ngokuswela imisebenzi, intengo iqansa ezitolo.
Umgcinisihlalo wenhlanganiso ye Consumer Council esigabeni se Matabeland, uMnu. Comfort Muchekeza, uthi imuli sezithwele nzima ezindlini ngokuqonga kwentengo yempahla ezitolo.
Isakhamuzi seSizinda koBulawayo, uMnu. Raymond Phiri, uthi umnotho welizwe usufike kusibanga esethusayo ngoba impilo isinzima kakhulu.
UPhiri uthi abanye emalokitshini lapho okwatshiswa khona izitolo sebethole ixesha lokuthola imali ngokuthengisa isinkwa lokunye ngemali ethe xaxa ngoba abanye bayadonda ukuyathenga edolobheni.
