WASHINGTON DC —
Inyamazana zendle, ikakhulu izilwane zibikwa sezibulele izifuyo ezinengi kakhulu emangweni we Hwange.
Izakhamizi ezikhulume le Studio Seven zithi zinakanela ukuthi ukuhlalisa kutsha abantu endaweni eziduzane lalapho okugcinwa khona inyamazana zendle, iHwange National Park yikho osekubangele ukuthi inyamazana zisabalale zingene emizini eseduzane zidinga ukudla.
Lanxa inani lenkomo esezibulewe yizilwane lingaziwa kahle ezinye izakhamizi zithi zingafika amakhulu amabili kodwa iphephandaba le The Chronicle lithi kulenkomo ezingamatshumi amathathu esezibulewe yizilwane.
Esinye isakhamuzi salummango, uMnu. Ndarapegwa Mathe utshele iStudio Seven ukuthi nsuku zonke kulembiko yenyamazana ezibulewe yizilwane lanxa inani selehlile kancance lezinsuku.