amalinks wokungena

Breaking News

Uhulumende kaMnangagwa Usethatha Ngenkani Ipulazi Lomntaka Sydney Malunga uSiphosami Labanye Bakhe


UMnu. Siphosami Malunga, umntaka muyi uSydney Malunga, owangcwatshwa emathuneni amaqhawe eNational Heroes Acre. (Photo: Siphosami Malunga)

Uhulumende kaMongameli Emmerson Mnangagwa usethathela uMnu. Siphosami Malunga, umntaka muyi uSydney Malunga, labanye bakhe ipulazi eNyamandlovu.

USiphosami Malunga, osebenza kunhlanganiso yeOpen Society of Southern Africa, ulobe umbiko enkundleni yeTwitter esithi uhulumende ufuna ukunika ipulazi leli abantu abangaziwayo.

UMalunga uthi wathenga ipulazi leli ebambisana losomabhizimusi, uMnu. Charles Moyo, loMnu. Zephania Dlodlo, okhokhela uhlangothi lweApplied Genetics Testing Center ekolitshini lemfundo yaphezulu eyeNational University of Science and Technology.

UMalunga, oloyise owangcwatshwa emathuneni amaqhawe eNational Heroes Acre eHarare, uveze ukuba bafonelwe ngumuntu okuthiwa nguMnu. Dodzi, okuhlangothi lukahulumende koBulawayo olubona ngezomhlabathi lokulima, obatshele ukuthi uhulumende usefuna ukuthatha ipulazi leli alinike abantu abambalwa.

Embikweni wakhe enkundleni yeTwitter, uMalunga uthe lokhu okwenziwa nguhulumende akulani lezomhlabathi ngakho-ke bazalwisana lakho ngazo zonke indlela.

Uthi batshengiswe isinqumo esafakwa kuGovernment Gazette ekupheleni komnyaka ka2020 esiveza ukuba uhulumende ufuna ukuthatha ipulazi leli.

UMalunga uthi kuyamangalisa ukuba kabatshelwanga ngodaba lolu kwaze kwaba ngoMvulo lapho abavezelwe khona ugwalo lokuthi bazathathelwa ipulazi leli kusetshenziswa imithetho yelizwe.

UMnu. Anxious Masuka, umphathintambo wezokulima eZimbabwe, nguye owaloba isinqumo lesi kugwalo olujulileyo oluveza inhlonso kahulumende.

Kubikwa ukuba uMalunga labanye bakhe bafisa ukuphanyeka udaba lolu emthethwandaba.

Kulandela okwethulwe nguMalunga enkundleni yeTwitter, isikhulumeli sikamongameli, uMnu. George Charamba, ulobe laye enkundleni le phezu kwalokhu okwethulwe ngabanye abantu kukhasi lika Malunga ukuba abantu baloba abangakwaziyo.

UCharamba ulobe esithi, “Lilimuke ukuba kalizifaki kulokhu elingakwaziyo kumbe elingela lwazi ngakho!! Kasuwe ofuna ukuthatha lokhu; alikho emulini yako Malunga. Lihlaba umkhosi ngenxa yokuthi uSipho ukhonkothe ebona incwadi eveza inhlonso yokuthatha umhlabathi!! Lingaphi iqiniso? Sitsheleni lina bosiyazi.”

Kasenelisanga ukuxoxa ngodaba lolu loMalunga, leziphathamandla zohlangothi lukahulumende olubona ngezomhlabathi lezokulima kanye loMasuka.

Uhulumende wathathela abamhlophe amapulazi afika inkulungwane ezine lengxenye – 4,500 wawanika amansundu. Okwamanje uthi uzanika imali bonke abathathelwa amapulazi kusukela ngomnyaka ka2000. Kodwa kukhanya esehluleka ukudinga imali yokunika abamhlophe abathathelwa amapulazi.

Facebook Forum

XS
SM
MD
LG