Abalandeli bomdlalo wenguqu basele bebambe owangaphansi ngemva kokunqotshwa kabuhlungu kweqembu elimela iZimbabwe, elamaWarriors emncintisweni wokudinga intshantshu zezwekazi le Africa oweAfcon oqhutshelwa kwele Egypt.
Iqembu le Zimbabwe litshaywe nge 4 ka nya liqembu le Democratic Republic of Congo emdlalweni walo wesithathu njalo ungowokucina owesibaya sika Group A.
Limpumela itsho ukuba iqembu le Zimbabwe liphutshe imidlalo yalo lisemsileni wengalane yesibaya sika Group A njalo lilomklomelo owodwa eliwuthole lize libe ngutshiki lobhanqa 1 ka 1 leqembu le Uganda.
Iqembu le Egypt yilo eliqede imidlalo yesibaya sika Group A lihlezi phezu kwengalane lilemiklomelo eyithoba munwe munye ngemva kokunqoba kuyo yonke imidlalo yalo emithathu.
Endaweni yesibili kuleqembu le Uganda elilemiklomelo emine kuthi ele DRC lona lilemiklomelo emithathu.
Inengi labalandeli bomdlalo wenguqu kwele Zimbabwe bebekhangelele ukuba iqembu lama Warriors lizanqoba ele DRC ukuze lithuthukise amathuba alo awokudlulela kusigaba esilandelayo esomncintiswano.
Obukele lumdlalo kumabonakude uCandy Mokoena uthi yena isimo somnotho esingamanga kuhle elizweni yiso laso esibangele ukuthi iqembu le Zimbabwe lingaphumeleli kumidlalo ye Afcon.
Mina ukudlala kwama Warriors kungidanisile sibili, kungizwisa ubuhlungu. Kodwa ngibona angani yinto nje ebesiyikhangelele. Yebo kambe besingakhangelela okuhle sizama ukubalekela iqiniso elokuthi ngesimo salapha ama Warriors asuka khona, vele bekumele bedlale njalo.
Kuyisibonelo esokuba baphuma endaweni lapho isimo somnotho kasimanga kuhle yikho ke kangibasoli nje loba nje ngidanile.
Intathelizindaba yezemidlalo uNash Mkokwayarira uthi iqembu le Zimbabwe kumele lakhiwe kakutsha ngemva kokuyangisa ilizwe elikwenze ngeSonto.
Umdlalo wama Warriors le DRC ube ngumdlalo oyangisileyo kakhulu ngoba abafana bethu labaqeqetshi bapheke imboza njalo into ekhona yikuba nxa kuthe kwaphekwa imboza imbiza iyakutulwa ichithwe.
Yikho ke abadlali labaqeqetshi konke kumele kulahlwe siqale kutsha ngoba nxa singasayenzanga njalo akula lapho esizakuyadlala khona sinqobe.
Umqeqetshi womdlalo wenguqu uAnele Nyathi laye usole abaqeqetshi beqembu lama Warriors esithi badlise iqembu lesizwe.
Kunzima sibili ngoba ukudliwa kweqembu lama Warriors nge 4 ka nya yi DRC kutshengisela ukuba kukhona lapho esisilela khona ngoba nxa ngisithi ngiyakhangela kumidlalo yonke esiyidlalileyo abaqeqetshi bethu batshengise ukuba bayasilela ekulandeleni imidlalo.
Imidlalo eminengi esiyidlalileyo ibingasiyo imidlalo eyokuthi besingehluleka ukuthi singaphumelela kodwa indlela abaqeqetshi abakade bekhetha ngayo abadlali ibingasiyo njalo lokhu kwenze ukuthi behluleke ukuthi beguqule isimo somdlalo besebhentshini.
Abalandeli bomdlalo wenguqu abanengi basole ukungaphiwa ithuba kwabadlali abafana lo Knox Mutizwa kanye lo Kuda Mahachi loba nje abagadli beqembu lama Warriors bebebuthundu.
Bekungokwesine ukuba iqembu lama Warriors lifinyelele ukuyadlala kumncintiswano we Afcon njalo kalizake lidlule kusigaba sezibaya selokhu laqala ukuphatheka kulimidlalo ngomnyaka ka 2004.