amalinks wokungena

Breaking News

Iqembu Lenguqu Lama Under 23 Liphumelele Ukuya kuAll Africa Games


Zimbabwe Young Warriors

Iqembu lamajaha aleminyaka engaphansi kwamatshumi amabili lantathu elimela ilizwe emdlalweni wenguqu liphumelele ukuyaphatheka kumidlalo ye All Africa Games ezaqhutshelwa elizweni le Congo Brazzaville.

Iqembu leli elaziwa ngokuthi ngama Young Warriors lifinyelele ukuyadlala kumncintiswano we All Africa Games ngemva kokuba ngutshiki lobhanqa 1 ka 1 leqembu labosowabo elimela ilizwe le Cameroon khonale eCameroon ngeSonto.

Limpumela itsho ukuba ele Zimbabwe linqobe nge 2 ka 1 nxa sekuhlanganiswa lempumela yomdlalo wehlandla lakuqala owaba seZimbabwe wona owaphela abafana bekhaya benqobe nge 1 ka nya.

Amalungiselelo eqembu lama Young Warriors abengekho mahle okokuthi limpumela imangalise abanengi ngoba umqeqetshi waleliqembu uKalisto Pasuwa ebethwele nzima elungiselela elabadlali abalutshwane amaqembu esala labadlali.

Kusenjalo iqembu labesifazane elimela ilizwe lona lehlulekile kumizamo yalo eyokuyaphatheka kumncintiswano ofanayo ngemva kokuba libe ngutshiki lobhanqa 2 ka 2 lele Ghana ngeSonto esigodlweni iHarare njengoba nxa sekuhlanganiswa lempumela womdlalo wehlandla lakuqala wona ophele iGhana inqobe nge 2 ka 1 iqembu le Ghana linqobe nge 4 ka 3.

..................................

Kolunye udaba olumayelana lomdlalo wenguqu elizweni le Zimbabwe isimo sengalane kusigaba se Castle Premier Soccer League siveza ukuba iqembu le Triangle yilo elihlezi phezulu lilemiklomelo elitshumi lantathu njalo lilingene ngemiklomelo lalelo elihlezi kundawo yesibili ele Dynamos.

Kundawo yesithathu kuleqembu le Chicken Inn lona elilemiklomelo elitshumi lambili kuthi kundawo yesine kuleqembu le How Mine elilemiklomelo eyithoba munwe munye.

Iqembu le ZPC Kariba likundawo yesihlanu lilemiklomelo eyithobaminwe mbili lona lilandelwa ngele Tsholotsho elilemiklomelo eyisikhombisa ndawonye le Highlanders kanye le Caps United.

Iqembu le Harare City lihlezi kundawo yethoba munwe munye lilemiklomelo emihlanu ngaphansi kwalo kule FC Platinum elemiklomelo emine njalo ilingene ngemiklomelo le Chapungu.

Kundawo yetshumi lambili kuleqembu le Hwange elilemiklomelo emithathu ndawonye le Buffaloes kuthi amaqembu ahlezi ngaphansi kwengalane elemiklomelo emibili ngathi iDongo Sawmills, iFlame Lily kanye le Whawha okuyiyo ejeke amanye amaqembu engalaneni.

......................................

Sikhangele imidlalo yenguqu edlalwe kwamanye amazwe ngempalaviki edluleyo;

NgaseNgilandi iqembu elihlezi phezu kwengalane ele Chelsea selilemiklomelo engamatshumi ayisikhombisa lantathu ngemva kokunqoba kwalo ele QPR nge 1 ka nya kuthi ngemva kwalo kuleqembu le Arsenal elinqobe ele Burnley nge 1 ka nya laba lemiklomelo engamatshumi ayisithupha lesithupha, kulandele ele Manchester United elibhaxabule omakhelwane balo ele Manchester City nge 4 ka 2 lakhuphula inani elimiklomelo yalo yaba ngamatshumi ayisithupha lanhlanu ikanti ele City likundawo yesine lilemiklomelo engamatshumi ayisithupha lanye.

Elizweni le Spain iqembu le Barcelona selikhokhela ngemiklomelo emibili ngemva kokuba ngutshiki lobhanqa 2 ka 2 leqembu le Sevilla ikanti lelo elihlezi kundawo yesibili ele Real Madrid linqobe ele Elbar nge 3 ka nya.

..........................

Sikhangele umdlalo wokugijima;

Umdlali weqembu le Zimbabwe Prisons Services uLyno Muchena nguye onqobe kumncintiswano we PPC Matopos 33 miler ngeSonto.

Lumncintiswano uqalele eMatopo National Park waze waphelela endaweni ye Bulawayo Athletic Club njalo oqede kundawo yesibili kucele labesilisa nguAndrew Chimbidzikai yena olandelwe ngu Leonard Koki njalo bobabili begijimela iqembu le butho lesizwe.

Kucele labesifazane kunqobe uLizzie Chokore kuthi lowo onqobe nyakenye uMonica Kativhu uqede ekundawo yesibili. Oqede ekundawo yesithathu nguSamukeliso Moyo

XS
SM
MD
LG