Iqembu elimela ilizwe le Zimbabwe emdlalweni wenguqu elamaWarriors seledlulele kusigaba esilandelayo esomncintiswano we African Nations Championships ngemva kokunqoba eleMauritius nge 3 ka 1 ngeSonto emini enkundleni yeBarboufields Stadium koBulawayo.
Iqembu le Zimbabwe linqobe nge 7 ka 1 nxa sekuhlanganiswa impumela yemidlalo yomibili eliyidlale lele Mauritius njengoba emdlalweni wehlandla lakuqala oqhutshelwe kulelolizwe linqobe nge 4 ka nya.
Ekhuluma lentathelizindaba zemidlalo, osaphethe isikhundla sikamqeqetshi weqembu lama Warriors uRahman Gumbo utshayele ihlombe abadlali bakhe ngokunqoba abakwenzileyo.
“Ngokubona kwami bonke badlale kuhle. Asingeke sithi siphuma emdlalweni sinqobile siphinde sikhale ngokuthi abafana kabadlalanga kuhle, bonke nje badlale kuhle. IMauritius iyazama loba belilizwe elincane kodwa bayazama ukwakha njalo kuzabalungela kusasa,” kutsho uGumbo.
Umgadli weqembu le Highlanders uPrince Dube nguye olitshayele emambuleni kathathu emdlalweni wangeSonto. Ohlohlele eleMauritius ngu Jean Roussety.
Iqembu lezivakatshi yilo eliqale ukutshaya amambule kodwa ele Zimbabwe lenelise ukulinganisa njalo besekungitshiki-lobhanqa 1-1 ngekhefu.
Umgadli uDube uphenduke wahlohla kabili ngehlandla lesibili okuzindaba ezimnandi kubalandeli beqembu le Highlanders njengoba igedi ubengaliboni kumidlalo yeligi.
Kusigaba esilandelayo esomkhankaso wokudinga amaqembu azakuyaphatheka kumncintiswano owokudinga intshantshu zezwekazi lase Africa, wona ozaqhutshelwa eCameroon ngomnyaka ozayo, iqembu le Zimbabwe lizadibana leqembu le Lesotho lona elinqobe ele South Africa nge 6 ka 2 nxa kuhlanganiswa imidlalo emibili edlalwe yilawamaqembu.
Umncintiswano we African Nations Championships ngowabadlali abadlala besekhaya kuphela njalo kuqembu le Mauritius bekudlala amajaha aleminyaka engaphansi kwamatshumi amabili kumidlalo yomibili eliyidlale lele Zimbabwe.
