amalinks wokungena

Breaking News

AmaWarriors Anqoba Iqembu leComoros 2 ka 0


Iqembu leZimbabwe Warriors
Iqembu leZimbabwe Warriors

Iqembu lenguqu elimela ilizwe le Zimbabwe liqale kuhle umkhankaso walo wokuzama ukuyadlala emncinitisweni we Africa Nations Championship -Chan ngokunqoba elikwenze ele Comoros nge 2 ka nya ngeSonto.

Abahlohlele iqembu leZimbabwe ngabathi uEvans Rusike kanye lo Marshal Mudehwe njalo umqeqetshi weqembu leZimbabwe uKallisto Pasuwa ubeyandise abadlali abasakhulayo kulumdlalo obusenkundleni ye Rufaro.

Limpumela itsho ukuba iqembu leZimbabwe lizibeke kusimo esihle esokuya dlala kusigaba esilandelayo salumncintiswano lapho elingadibana leqembu elizaphuma phakathi kwe Botswana kanye le Lesotho.

Iqembu le Zimbabwe lizavakatshela kwele Comoros ngemva kwamaviki amabili ukuyadlala ihlandla lesibili lalumdlalo.

Abafana bama Warriors sebenelise ukudlala kuyo yonke imncintiswano ye Chan selokhu lumncintiswano odlalwa ngabadlali abadlala besekhaya wasungulwa ngomnyaka ka 2009.

Ilizwe le Rwanda yilo elizaqoqa imidlalo yeChan ngomnyaka ozayo.

Kusenjalo umdlali ophatheke kulumdlalo uDivine Lunga oweqembu le Chicken Inn ubikwa esethwele nzima esigodlweni eswele umuntu ongamelaphisa ngemva kokuba elimele idolo.

Imibiko ephuma eHarare ithi lumdlali uhanjiswe kudokotela othe kumele ahlolwe ngemitshina ukuze kubonakale ukuba ulimele njani manje inkinga sekuyikuthi inkokheli zenhlanganiso ye Zifa azisabambeki ukuze zibhadale imali yokuba lumdlali ayenziwe leso scan.

..........................................................................

Kolunye udaba olumayelana lomdlalo wenguqu umdlali owayengukaputeni weqembu le Njube Sundowns uMephias Webb uqaleke wahle wedlula emhlabeni ngesikhathi edlala ibhola lokuzilibazisa enkundleni yako Bango elokitshini le Mpopoma ngeSonto.

Ababone lesisehlakalo sisenzakala bathi uWebb ufike ko Bango wathola abanye bakhe abedlala labo kuqembu lakhe lesocial ele Mthala bezidlalela nje bodwa laye wasebuyela endlini wayathatha izikhabiso.

Ekuphendukeni kwakhe kubikwa efike wadlala walitshayela kabili emambuleni kodwa uthe umdlalo usaphakathi wabonakala esengobamba amadolo waseqaleka.

Abanye bakhe bamgijimisele esibhedlela kodwa bekungasasizi lutho ngoba ubesedlule emhlabeni.

Impumela yenhlolisiso yabodokotela, iautopsy ngesilungu, iveze ukuba uWebb usuke wagijima kakhulu amaphaphu asekhukhumala wasevaleka ukuphefumula.

Kusenjalo, umgadli weqembu le How Mine uCharles Sibanda ulaliswe esibhedlela seMpilo ngemva kokuba sengozini yomgwaqo eyenzakale kuNketa Drive emtshiye elimele entanyeni, esifubeni kanye lasembanjeni.

Abahambe bayambona bathi ulimele kakhulu kodwa isimo sakhe kasikho sibi okokuthi angalahlekelwa yimpilo yakhe.

.............................................................

Sikhangele ukuba amazwe awezwekazi le South America aqhuba njani kumncintiswano we Copa America.

Amazwe athi ele Chile, ele Bolivia, Argentina, Paraguay, Brazil, Peru, Uruguay kanye lele Colombia yiwo asefinyelele kusigaba se quarter – final ngemva kokugqitshwa kwemidlalo yezibaya kulumncintiswano oqhutshelwa elizweni le Chile.

Isigaba se quarter-final siyaqala mhla zingamatshumi amabili lanhlanu lapho iqembu elimela ilizwe le Chile elizadibana khona lele Uruguay kuthi ngosuku olulandelayo ele Bolivia lizadlala lele Peru.

Mhla zingamatshumi amabili lesikhombisa iqembu le Argentina lizangqikilana lele Colombia kuthi ngosuku olufanayo iqembu elimela ilizwe le Brazil lizadlala lele Paraguay ikanti ama semi finals azakuba khona mhla zingamatshumi amathathu kunyanga kaNhlangula.

Umgadli olodumo odlalela iqembu le Brazil uNeymar akaselakho ukuba aphatheke kulumncintiswano ngemva kokuba ejeziswe ngokuba engadlali imidlalo izibe mine ngemva kokulwa ekupheleni komdlalo weqembu lakhe lele Colombia.

XS
SM
MD
LG